Äfğanstannıñ planlaştıru ministrı Haji Mohammäd Mohaqiq, üz wazifasınnan prezident häm finans ministrı belän bulğan qarşılıqlar säbäple kitkänen belderde.
Finans ministrı Aşraf Ğani belän Mohammäd Mohaqiq administrativ mäs'älälärdä kileşä almağan. Ämma prezident Qarzainıñ matbuğat wäkile Jawid Ludin bügen radiobıznıñ äfğan redaksiäsenä, Mohaqiq ministr urnınnan kitergä üze teläde, dide: "Xökümät isemennän şuña açıqlıq kertäsem kilä, yäkşämbe irtän xökümät utırışında Möhaqiq äfände wazifasınnan kitergä teläk belderde. Aña xökümättä urın bulmawı häm annan çığarğa teläwe turında belderde" dide prezident wäkile.
Mohaqiq süzlärenä qarağanda, bäxäs – finans ministrı planlaştıru ministrlığı qaramağında bulğan eşlärgä qatnaşa başlağaç çıqqan. Mohaqiq bu xaqta Qarzaiğa xäbär itkän, ämma prezident moña ähämiät birmägän. Elekke planlaştıru ministrı süzlärençä, üzeneñ wazifadan kitüen ul ikençe könne genä belgän.
