Könbatış Yarnıñ Jenin şähärendä İsrael ğaskärläre bügen 5 fälestin suğışçısın atıp üterde. Alar barısı da Al-Aqsa intixarçıları brigadası äğzaläre ide dielä xäbärlärdä.
İsrael häm Fälestin premyer-ministrları kiläse atnada oçraşırğa kileşkän. İtaliä tışqı eşlär ministrı Franko Frattini bügen Misır prezidentı Hösni Möbäräk belän oçraşqannan soñ, Möbäräk Ariel Şaron belän Axmed Qurei'nı kiläse sişämbe oçraşıp söyläşergä kündergän, dip belderde: "Prezident Möbäräk Premyer ministr Ariel Şaronnıñ fälestin premyer-ministrı Abu Ala belän oçraşuın oyıştıru eşenä möhim öleş kertte, oçraşu 16nçı mart könne bulaçaq", dide İtalyan tışqı eşlär ministrı.
Qurei fälestin premyer-ministrı bulğannan birle bu äle berençe İsrael-Fälestin oçraşuı bulaçaq. Yaqın Könçığışta köç qullanu säbäple mondıy oçraşular gel kiçekterelep kilde. İke premyer-ministrlarnıñ da yardämçeläre xäbär itüençä – kiläse sişämbegä bilgelängän bu oçraşuğa äle äzerlänäse bar.
Şaronnıñ kiñäşçese Raanan Gissin süzlärenä qarağanda, şul könne oçraşu uzdıru plannarı bar, ämma bu äle raslanmağan, dide. Bu könnärdä Norvegiä başqalası Osloda bulğan fälestin premyer-ministrı Ahmed Qurei, oçraşu – aldan bulaçaq äzerlek uñışlı bulsa ğına ütkärelergä mömkin, dip belderde.
