Äle küptän tügel genä 10 nämzät saylawlarda qatnaşudan baş tartqan ide. Ä 11nçe marttan başlap, nämzätlär kinät töşep qala almıy inde, qanun quşmıy. Üzäk saylaw komissiäse citäkçese Anatoliy Fomin xäbär itkänçä, kampaniä başlanğannan birle 50 urınğa barlığı 282 keşe köräşep qararğa teläk beldergän. Alarnıñ 64-te saylawlarda qatnaşmayaçaq. Qaysıları üzläre ğariza birep, köräşep tormasqa buldı, başqalarınıñ terkälü käğäzlären, qanun bozğan öçen, saylaw komissiäläre yuq itte. Xäzer saylaw komissiäläre xezmätkärläre, töşep qalğannarnıñ isemnären sızar öçen, 2 million 800 meñ byületenne qarap çığarğa tieş.
Bu könnärdä säyäsi reklama, köçäygännän köçäyä bara. 12 martta ügetläw çığışları tämamlanaçaq. Şuña, säyäsätçelär barlıq mömkinleklärne qullanıp qalırğa tırışa.
«Berdäm Rusiä» firqäse häm anıñ nämzätläre küpçelek televidenie kanallarında, radiolar efirında yış kürenä-işetelä. Şunıñ östäwenä, däwlät oyışmaları ütkärgän barlıq cielışlarda diärlek, elekke zamannardağı kebek, ildäge säyäsi wazğiät xaqında mäğlümat birelä, häm saylawlarğa barırğa kiñäş itelä. Xakimiät oyıştırğaç, ügetläw dä, xakimiät firqäse öçen bara.
Şuşı könnärdä, räsmi mäğlümät çaralarında «Rusiä regionnarı firqäse» xaqında mäğlümat yış çığa başladı. Xätta İntertat.ru elekton gazetası firqäseneñ säyäsi programmasın bastırıp çığardı. Bu firqä tarafdarlarnıñ mäğärif xezmätkärläre belän belän oçraşuları xaqında da, räsmi televidenie kanalları xäbär itte.
Soñğı könnärdä, Tatarstan radio-tele efirında «Uñ köçlär berlege» firqäseneñ säyäsi reklaması kürenä başladı. Gäzitlärdä ara-tirä mäqälälär basılıp tora. 11 mart könne kiç «Uñ köçlär berlege» firqäseneñ Tatarstan bülege wäkilläre däwlätneke bulmağan «Variant» kanalında, ä 12 martta «Efir» telekompaniäse efirında çığış yasarğa ciena. «Uñ köçlär berlege»neñ «Efir» telekompaniäse başlığı Andrey Grigoryevqa teläktäşlek kürsätkän ide. Şuña, saylanğan oçraqta, bu häm tağın 4 nämzätneñ 14 marttan soñ da, uñ qaraşlarda qaluın farazlarğa mömkin.
«Родина» - «Watan» saylaw blogınıñ säyäsi reklaması küzgä bärelmi. Bu säyäsi köç tarafdarları ğädättä televideniedä buşlaw birelä torğan efir waqıt ğına faydalandı. Ayırım qupşı kampaniälär ütkärmäde. 12 martta Qazanğa kiläçäk, «Родина» «Watan» saylaw blogı wäkile Viktor Geraşenko, bälkem, soñğı könnärdä genä bulsa da, Tatarstandağı saylawçılarnıñ iğtibarın cälep itärgä yärdäm itär.
Oppozitsiä dip sanaluçı «Жизнь» «Tormış» firqäse häm kommunistlar firqäse televidenie häm radio efirda kürenmi. Bu firqä tarafdarları uramnarğa, bazalarğa çığıp, saylawçılar belän turıdan turı eş itärgä tırışa. Säyäsi köräştä qaysı ısul otışlıraq bulır, 14 marttan soñ kürerbez.
Bikä Timerova.
