Accessibility links

Кайнар хәбәр

Semberdä gigant sänäğät şirqätläre tözü şawqımı tatar awıllarınıñ celegen suırıp aldı


Şulay da elekkeräk yıllarda şähärgä kilep urnaşqan tatar yäşläre milli üzañnan çitläşmägännär ide äle. Sember qalasınıñ Kindyakovqa, Tönyak, Yaña şähär digän öleşlärendä, öç cirdä, kiçlären yäşlär uyınnarı görli ide. Nigäder, “Şanxay” dip atalğan bu uyınnar, 80-yençe yıllar azağında sünderelde. Moña militsiäneñ “tärtip saqlawı” da, törle gruppirovkalar barlıqqa kilüe dä säbäp bulğandır. Bälki urıslaştıru säyäsäte dä üz öleşen kertkänder inde.

Xäyer, bügen süz ul kiçälär turında tügel – ä Ciñü parkında, şähärneñ Tönyak (Sever) dip atalğan yağında barğan uyınnarnıñ canı bulğan Däwlätşah ağa Näfiew turında. Ul Çüpräle rayonı Biznä awılında tuğan. Qızamıq belän awıru arqasında 7 yäşendä yaktı dönya maturlığın kürü bäxetennän mäxrüm qalğan. Şulay da yäşäw därten yuğaltmağan, aptırap qalmağan – ğarmunda, bayanda uynarğa öyrängän. Suqırlar cämğıäte oyıştırğan konsert kollektivı äğzası bulğan. Läkin soñnan, ayırım tatar kollektivları yuk itelgäç, kiez itek basu şirkatendä eşlägän.

Däwli ağa äle dä tatar cämäğätçelege oyıştırğan barlıq çaralarda da qatnaşa – tatar moñın yañğırata. Semberdä şuşı könnärdä anıñ 75 yıllıq yubiley kiçäse buldı. Kiçädä anıñ xörmätenä maxsus yazılğan şiğırl''lär uqıldı, cırlar başqarıldı. Älbättä inde, Däwli ağa üze dä ğarmun tarttı.

Çığış yasawçılar anıñ tormış yuldaşı Rauza xanımğa da matur süzlär äyttelär. Äyterlek tä inde: alar härwaqıt bergä, citäkläşep yörilär. 50 yıl bergä yäşäp, menä digän öç bala üstergännär.

Däwli ağa häm Rauza apa, bügenge tormış awırlığannan zarlınıp, küz yäşläre tügep yäşäwçelärgä ürnäk bulıp toralar.

Ayrat İbrahim, Sember
XS
SM
MD
LG