Saylawlar häm säyäsät tormışnıñ böten tarmaqlarına ütep kergän kebek, virtual dönyanı da çitlätep ütmäde. Rusiä Prezidentı bulıp saylanırğa telägän nämzätlärneñ ayırım internet säxifäläre disezme, säyäsi firqälär xaqında saytlar disezme, global çeltärdä - barın da tabıp bula. Qazan portalında, mäsälän, saylawlarğa bağışlanğan ayırım säxifä açıldı. Anıñ adresı www.e-kazan.ru/2004. Anda barlıq firqälärneñ programmaları, isemlekläre belän tanışırğa mömkinlek birelä.
Äğär saylawlar barışın on-line da, real waqıtta küzätep barırğa telisez ikän, saylaw könne, Rusiä Üzäk saylaw komissiäneñ internet säxifäsenä kerep çığa alasız. Adresı -www.cikrf.ru
Tatarstan Üzäk saylaw komissiäseneñ saytı bar barın, ämma, anda tawış birü näticäläre belän on-line räweşendä tanışıp bulmayaçaq. Biredä xätta, yañalıqlar bülege dä qaralmağan. Anıñ qarawı sayt idäräçeläre www.tatar.ru, www.intertat.ru kebek elektron mäğlümat çaralarına çığu yulları kürsätkän. Tatarstan Üzäk saylaw komissiäseneñ saytın kürergä teläsägez www.tatarstan.izbirkom.ru adresı belän kerep, şuşı säxifäne taba alırsız. Tawış birü näticäläre turında operativ mäğlümatlar kiräk bulsa, sez alarnı intertat.ru elektron gäziteneñ tatar häm urıs büleklärendä uqıy alaçaqsız. Bu gäzitneñ tatar bülegenä turıdan-turı keräm disägez, ber keçkenä xäylägä barırğa kiräk. www.intertat.ru dip tügel, ä www.intertat.at.tt digän adresnı ciarğa kiräk.
Tatar gäziteneñ konferensiäsendä barlıqqa kilgän soraw, tatnetçılarnıñ iğtibarın cälep itte. «Çeltärdä tatar äkiätlären qaya tabırğa ikän? » dielgän inde anda. Bu soraw belän bergä avtor, ber qızıqlı tarixnı bäyän itä. İspaniädä ğömer itüçe ber xatın-qız rässam, tatar xalıq äkiätlären, üzeneñ räsemnäre belän bizäp, kitap itep bastırıp çığarğa teli ikän. Şuşı eş öçen ul, global çeltär aşa, äkiätlärneñ tekstların cibärüne sorağan.
Tatar äkiätlären global çeltärdä tabıp bulamı? Ni ğäcäp, bu sorawğa uñay cawap tabıldı. www.tatarica.ru saytında, kitapxanä bülegendä urısça häm tatarça äkiätlär täqdim itelä, şulay uq www.kitapxane.noka.ru elektron kitapxanä saytında da, tatar xalıq awız icatı cäwhärlären ezläp qararğa mömkin.
Tatarstan milli kitapxanäseneñ dä saytı bar. Anıñ adresı - kitaphane.ru Qızğanıç, säxifäneñ tatar bülege bik yarlı, ä urıs bülegenä kerep uqısaq, elektron kitapxanä tüläwle xezmät kürsätä digän yazuğa tap bulasıñ. Läkin, biredä buşlaw da, şaqtıy faydalı mäğlümat tabıp bula. Ä tatar äkiätlären biredä ezlätergä teläsägez, kitapxanä xezmätkärläre, ayırım bäyägä, kitaplarnı poçta, yäki e-mail aşa cibärä alalar. Adresın qabatlıym - kitaphane.ru.
Bikä Timerova. bike@azatliq.ru
