Yal könnärendä dönya kürgän respublika gäcitlärenä küzätüne Watanım Tatarstannan başlıybız. Anıñ 13 mart sanınıñ berençe bitendä şaqtıy ğına räsmi xäbärlär urın alğan. Monda Qazanda soñğı könnärdä bulğan oçraşular, qabul itkän qararlar, yaña qorılmalarnıñ açışları turında yazmalar urın alğan. Şimbä könne inde tege yäki bu nämzät öçen agitatsiä alıp barırğa yaramağanlıqtan, gäcittä saylawlarda qatnaşuçılar xaqında inde yazılmağan. Alay da, xalıqnı saylawlarğa barıp, üzläreneñ tawışların birergä öndäwlär dä bar monda. Annan tış, Watanım Tatarstanda Böyek Watan suğışında ciñügä 60 yıl tulu uñayınnan, Özelä üzäk, iskä töşälär dä digän mäqälä urın alğan. Anda Äxät Safiullin älege suğışnıñ veterannarı, millättäşlärebez Kamaletdin abıy belän Zäynäpbanu apanıñ teträndergeç, awır tormışları xaqına söyli. Şunda uq Asiä Yunısovanıñ Ülemsezlek dip isemlängän yazması da urın alğan. Ul tanılğan cırçı Räşit Wahapovqa bağışlana. Mäqälädä Asiä Yunısova uquçılarnı cırçınıñ yazmışı häm icatına bağışlanğan qızıqlı ber kitep belän tanıştıra. Räşit Wahapov: zaman, icat, şäxes dip isemlängän kitapnı böyek cırçınıñ awıldaşı Rifat Fättäxov bastırğan. Şuña da, älege basmada Räşit Wahapovnıñ yäşlege, bala çağı, äti-äniläre turında da qızıqlı mäğlümätlär şaqtıy.
Şähri Qazan uquçıların Rusiäneñ yaña Eçke eşlär ministrı Räşit Nurğäliev belän tanıştıra. Ätise yağınnan anıñ näsel şäcäräse Ätnä rayonına totaşa ikän. Şulay uq gäcittä Arça rayonında ütkän xezmät aldınğıların xörmätläw bäyräme häm uqıtuçılar kiñäşmäse xaqında da belep bula.
Tatarstan yäşlärneñ 13 mart sanında Sanı bar, sämäne yuq digän mäqälädä İldar Zakirov respublikada awıl xucalığı tarmağınıñ torışı xaqında söyli. Bu yazmanıñ nigezendä – awıl xucalığı eşçänlegeneñ 2003 yıl näticälärenä bağışlanğan kiñäşmä. Respublikada bıyıl da mul uñış alıp, tatarstanlılarnıñ urıp-cıyuda, terlekçelektä şaqtıy ğına äybät eşläwenä qaramastan, kiñäşmädä awılnıñ xälsez iqtisatı turında da, quldan ıçqındırılğan mömkinleklär häm käyefne qıra torğan finans kürsätkeçlär xaqında da süz barğan. İldar Zakirovnıñ mäqäläse dä näq şuşı xaqta. Awıl tormışı temasın gäcitneñ şul uq sanında Urtalıqta digän mäqälä dä däwam itä. Anda İskändär Siraci Quqmara rayonınıñ Bitlänger awılı xaqında yaza. Kümäk xucalıq taralıp barıp, fermer xucalığı äle oyışıp betmägän bu awılda tormış şaqtıy awır bara, cir büleşü dä ığı-zığılar belän bäyle monda. Gäcitneñ şimbä sanında dönya kürgän tağın ber qızıqlı yazma Arifmetika dip atala. Anıñ avtorı – İlfaq Şihapov, faxişälek mäs’äläsenä möräcäğät itä. Ul üzeneñ yazmasında tönge kübäläklärneñ küpme aqça eşlägännären sanıy. Häm şuşı şöğel belän tatar qızlarınıñ da yıldan-yıl kübräk şöğellänüen istä totıp, ul alardan kergän aqçanı tatar möğallim-möğällimäläreneñ matdi xälen yaxşırtuğa yäki tatar itep üsterügä totarğa täqdim itä. Xäyer, bu xaqta alarnıñ üzläreneñ fikerläre monda yazılmağan.
Gölnaz İlgizär
