Accessibility links

Кайнар хәбәр

Qabuldağı xökümät ilneñ könbatışındağı Hirat wilayätenä östämä ğäskärlär cibärä


Äfğanstannıñ üzäk xökümäte ilneñ könbatışındağı Hirat wilayätenä meñ yarımlıq ğäskär cibärä, xörmätle tıñlawçılar. Uzğan atna azağında anda saqlanu ministrlığı köçläre häm Hirat başlığı İsmail Xannıñ suğışçıları arasında bäreleşlär buldı, aña qädär isä Hiratta İsmail Xannıñ ulı, Qabul xökümätendä sivil aviatsiä ministrı bulıp eşlägän Mirwäğiz Sadıyq üterelgän ide. Bäreleşlärgä näq menä anıñ üleme säbäp buldı dip belderelsä dä, Hirattağı kierenkelek artında İsmail Xannıñ Qabuldağı xökümät belän xakimiatne bülä almawı tora kebek.

Äfğanstannıñ saqlanu ministrlığı wäkilläre bügen radiobıznıñ Qabul xäbärçesenä Hirat wilayätenä barlığı ike batalion ğäskär cibäreläçäk dip belderde. Amerikan xärbiläre öyrätkän meñ yarım ğäskäri Hiratqa saqlanu ministrı Möxämmäd Fähim ämere belän kitä, ul şuşı qararğa äfğan xökümäteneñ yäkşämbe kiçen uzğan maxsus utırışınnan soñ kilgän. Xökümät isä yäkşämbedä Hiratta kinät kierenkelänep kitkän wäzğiatne tikşerü öçen cıyılğan ide. Wilayät başlığı İsmail Xan Qabuldağı üzäk xökümät belän inde küptännän xakimiat büleşä almıy, bu ölkädä ul yış qına Äfğanstan saqlanu ministrlığı köçläreneñ Hirattağı xärbi citäkçese general Ğabdulzahir Näibzadä belän qarşılıqqa kerep tordı. İsmail Xannı Qabuldağı üzäk xökümätkä yaqınaytu maqsatında anıñ ulı Mirwäğiz Sadıyq ilneñ sivil aviatsiä ministrı itep bilgelängän ide. Yäkşämbe könne isä granata şartlaw näticäsendä ul Hiratta hälak buldı, İsmail Xan monıñ öçen cawaplılıqnı general Naibzadä keşelärenä yökläde, anıñ qorallı törkemnäre şunda uq generalnıñ Hirattağı yortın, häm anıñ xärbi idaräsen qamap aldı. Düşämbegä qarşı töndä ike bina da İsmail Xan keşeläre tarafınnan yawlap alındı. Äfğan räsmiläre birgän mäğlümatqa qarağanda, şuşı bäreleşlärdä 50-dän alıp 100-gä qädär keşe ülgän, yuğaltular ike yaqta da bar dip belderelä. Düşämbedä Hiratqa saqlanu ministrı Möxämmäd Fähim üze kilde, anıñ belän eşke eşlär ministrı Ğäliäxmät Cälali dä bar ide. Alar Hirat başlığı İsmail Xan belän oçraşıp, anıñ ulı hälak bulğan wäzğiatne tikşerde. Älegä qädär general Naibzadäneñ qayda buluı mäğlüm tügel. Anıñ yardämçese radiobızğa, general xäbärsez yuğaldı häm ul İsmail Xan keşeläre tarafınnan üterelä ala dip belderde. Yäşägän yortı qamalğan çaqta general telefon aşa radiobız xäbärçesenä bolay digän ide.

Audio, general Naibzadä

"Sez tirä-yündä avtomattan atularnı işetä alasız, Hirat xalqı İsmail Xan keşeläreneñ minem ğailägä höcüm itüen kürep tora häm xäzer monda, minem öy tiräsendä çın suğış başlanıp kilä" digän ide yuğaluına berniçä säğät qalğanda Äfğanstan üzäk xökümäteneñ Hirattağı xärbi wäkile general Naibzadä. Ul İsmail Xan ulın üterü anıñ keşeläre eşe buluın kire qaqmadı, läkin tağın şunı da xäbär itte, İsmail xan törkemnäre belän bäreleşlär Hiratta äle ministr ülemenä qädär başlanğan bulğan. Anıñ süzlärenä qarağanda, bäreleşlär artında İsmail Xannıñ wilayättä barı tik üz idaräsen genä urnaştıru teläge yata.

Audio, general Naibzadä

"Bezneñ aradağı ayırmalıqlar bilgele - bez üzäk xökümät xakimiaten bar il buylap urnaştırırğa telibez, alar isä monı telämi. Alar barı tik üz qüwäten nığıtıp töbäk belän barı tik üzläre genä idarä itärgä teli" dip añlata Hirattağı qarşılıqnı, xäzerge waqıtta qayda buluı haman da bilgesez general Naibzadä. İsmail Xan yağı Qabuldağı xökümätneñ Hiratqa östämä ğäskär cibärü qararın "kiräge bulmağan" dip bäyäläde. Maşinalar häm hawa transportı yardämendä kitereläçäk şuşı meñ yarım ğäskäri Hiratqa tulısınça düşämbe kiçen kilep urnaşaçaq dip kötelä.

Kärim Kamal, Praga
XS
SM
MD
LG