Accessibility links

Кайнар хәбәр

Qazanda balalar xorlarınıñ forumı bara


Tatarstannıñ Mäğärif ministrlığı balalarnı fizik yaqtan sälämätländerü belän ber rättän, alarnıñ ruxi dönyasın üsterü, bayıtu mäs’äläse belän dä şöğellänä. Qazanda şuşı könnärdä älege ministrlıq tarafınnan ütkärelä torğan IV töbäkara balalar cır kollektivlarınıñ forumı näq menä şuşı xaqta söyli. Monda Rusiäneñ Mäskäw, Kirovograd, Vologda, Sçelkovo, Snejinsk şähärläreneñ balalar törkemnäre belän berrättän respublikanıñ Qazan, Tübän Kama, Aqtanış, Aznaqay, Yäşel Üzän rayonınnan uquçılar xorları qatnaşa. Barısı forumğa 800 tiräse yäş cırçı cıyıldı. Sişämbe könne Tatar däwlät filarmoniäseneñ Konsertlar zalında älege forumnı açu tantanası uzdı. Anda Mäskäw qunağı - Xalıqara xor berlege citäkçese Boris Smetanin, Tatarstannıñ Mäğärif ministrı Farız Xarisov qatnaştılar. Alay ğına da tügel, alar bu tantanadan soñ bulğan ike säğätlek konsertnı da başınnan axırına qädär tıñlap utırdılar. Çönki monda çığış yasağan kollektivlar arasınnan Boris Smetanin iñ yaxşıların saylap alıp, alarnı Xalıqara xor berlege äğzälärenä täqdim itäçäk. Bälki şuñadır da, konsert bik matur buldı. Anda törle yäştäge balalar, bersennän-berse matur äsärlärne bik osta itep başqardılar. Şunısın äytergä kiräk, çittän kilgän kollektivlar arasında respublika törkemnäre dä yuğalıp qalmadılar.

Forumda tatar telendä dä çığış yasawçılar buldı. Şularnıñ berse - Aqtanışnıñ icat üzäge qarşında eşläp kilüçe balalar xor kollektivı. Xäzer üzläreneñ xorları häm älege bäygegä kilü maqsatları turında anıñ citäkçese Räfidä Nuriäxmätova söyli.

Bez äle barı tik ike genä yıl eşlibez. Şuña da bez monda kilgän xalıqara bäygelärdä çığış yasağan kollektivlar arasınnan iñ äybät çığış yasawçı tügelder. Läkin Qazanğa kilep, şuşı forumda qatnaşıp bez üzebezgä üsü ürlären kürdek, bu bezneñ öçen bik köçle stimul bulaçaq. Şuña da, minem balalarnı monda bik alıp kiläsem kilgän ide. Xäyer, bezneñ balalar sınatmadılar, bik äybät çığış yasadılar. Alarğa monda bik oşadı

Qazanda ütä torğan IV töbäkara balalar xorlarınıñ forumı çärşämbe könne üzeneñ eşen tämamlayaçaq. Anıñ yabılu tantanası 24 mart könne Piramida küñel açu üzägendä ütäçäk.

Gölnaz İlgizär

XS
SM
MD
LG