Serbiä häm Çernogoriä premyer-ministrı Vojislav Koştunica bügen Brüsseldä Yevropa Berlege Kosovoda xakimiätne büleşüne yaqlar digän ömet belderde. Yevropa Komissiäse prezidentı Romano Prodi belän bulğan oçraşu waqıtında Koştunica, Kosovonı "kantonnarğa" bülü – töbäktäge serblarnıñ häm başqa azçılıqlarnıñ xoquqlarına garantiä bulaçaq, dide: "Çınbarlıqta, bu idea – yañalıq tügel häm Serbiä belän Çernogoriädä barlıqqa kilmäde. Bu turıda berençe tapqır Yevropa Şurası täqdim yasadı – avtonomiä häm xakimiät büleşü yulı belän Kosovo häm Metokiädä demokratik cämğiät tözü, serb häm alban bulmağan millät wäkilläreneñ xoquqların yaqlaw turında... keşe xoquqların yaqlaw mäs'äläsendä" dide Vojislav Koştunica.
Şulay uq anıñ süzlärençä, älege plan Kosovo statusına ber nindi dä üzgäreş kertmiäçäk.
Yevropa Berlegeneñ matbuğat wäkile Emma Udwin, Berlekneñ bu plan turında älegä räsmi fikere yuq, dide, ämma Yevropa Berlege provinsiädäge Berläşkän Millätlär idaräsen beterü turındağı ber nindi plannı yaqlamayaçaq, dip östäde Berlekneñ matbuğat wäkile.
