Accessibility links

Кайнар хәбәр

Semberdä atnalıq mädäni çaralar


Ul''yan ölkäseneñ öç töp xalqı avtonomiäläre Ul''yanov rayonı üzäge İşeyevka qasabasında ana tele xälläre turında fiker alışu oyıştırdılar. Çarada rayon başlığı Fedor Grişin häm başqa citäkçelär dä qatnaştı.

Yaña Bidänge awılı mäktäbe rayonda tatar telen uqıtunıñ töp teräge bulıp sanala. Mäktäp direktorı Färidä Ğimayıva tırışlığı arqasında tuğan Qurçaq teatrınıñ eşçänlege başqalarğa da ürnäk bulıp tora.

Läkin başqa awılları xalqınıñ 20-30 protsentın tatarlar täşkil itsä dä, kübeseneñ mäktäplärenä tatar teleneñ ise dä kilmi, diärgä bula. Anda, bälki, rayon üzäge İşeyevka mäktäbennän ürnäk alalardır. Ä qayber awıllarda tügäräk, fakul''tativ digännäre bulsa da, alarnıñ eş näticäläre kürenmi.

Şulay da utırışnı bötenläy faydasız dip bulmıy. Rayon başlığınıñ iğtibarın ölgergän mäs`älälärgä yünältü ezsez ütmäs. Ul barlıq çuaşlı-tatarlı awıllarda fakul''tativlar açarğa wäğdä birde. Şulay uq Saranski, Çabaqsar, Qazanğa uqıtuçılar ekskursiäse oyıştıru öçen avtobus belän yärdäm itäçägen belderde.

Çarada öç töp xalıq avtonomiäläre qatnaşuı internatsionalizm çağılışı dip bäyälände. Xäyer, mondıy qatnaş çaralar ğädätkä kerep bara kebek. Yaña şähärneñ 75-mäktäbendä uzğan “etnokul''tura bäyräme” dip atalğan çara da şundıylardan. Anda tantanalı açıştan soñ törle millätlär balaları fol''klor uyınnarı kürsättelär. Soñnan xezmät, räsem däreslärendä yasağan äyberläre belän tanıştırdılar. Alarnıñ millilege ürnäk alırlıq, dielde. Bäyräm balalar äzerlägän konsert belän tämamlandı.

1990-yıllar başında Näwrüz bäyrämen zur zallarda tatar milli xäräkäte teatral''läşterelgän tamaşa itep uzdıra başlağan ide dä – soñğı yıllarda sünde. Xäzer anı Ul''yanda yäşäwçe äzärbäycannar ğına zurlap uzdıralar.

Şulay da Näwrüz bötenläy onıtılmıy äle. Yaña şähärneñ 246-balalar baqçasında eşläp kilüçe tatar balaları törkeme tärbiäçeläre Xalidä Şäräfetdinova belän Älfiä Säyfetdinova menä digän bäyräm yasadılar. Anda yäş äti-änilär dä balalarınıñ çığışların, uynawların räxätlänep qarap utırdılar. Alar tärbiäçelärgä çın küñeldän räxmät belderdelär.

Ä bäyrämdä qatnaşqan “Tuğan tel” äğzaları yäş äti-änilärne şatlıqların monda ğına tügel, dus-işläre, tuğan-tumaçaları arasında da belderergä, alar aldında maqtanıp ta alırğa öndädelär. Bu bik zaruri, çönki Yaña şähärdä nibarı 16 balanıñ ğına şundıy törkemdä tärbiälänüenä, tiränräk uylasañ, şatlanırğa tügel, ükerep yılarğa kiräk. Şuşı uq baqçanıñ da här gruppasında 3-5 tatar balası tärbiälänä. Baqça mödire Ol''ğa Koroleva äytüençä, ägär dä teläwçelär bulsa, tağın ber tatar balaları törkeme oyıştırırğa mömkin.

Biredä tärbiälänüçe balalarnıñ äti-äniläre bu yaqtan da tırışıp qararğa niät belderdelär.

Ölkä üzägeneñ iñ zur zalında – Lenin memorial'' üzägendä Firzär Mortazin citäkçelegendäge konsert törkeme birgän tamaşa uñışlı uzdı. Xalıq küp ide. Konsertnı küptän üzen sağındırğan Göldaniä Xäyrullina häm qısqa ğına waqıt eçendä Sember xalqınıñ mäxäbbäten yawlağan Zölfiä Minhaceva ayıruça bizädelär.

Ä menä İlham Şakirov isemendäge konkurs laureatı Marsel'' Wäğizevneñ çığışı yäm östenä yäm buldı. Anıñ üze yazğan “Mäñge yäşä, Qazanım” digän cırı konsertnıñ yözek qaşıday qabul itelde.

Ayrat İbrahim, Sember

XS
SM
MD
LG