Bu kiñäşmägä ikelätä qızıqsınu belän bardım xörmätle tıñlawçılarıbız. Añlaşıla ki berse hönärem quşqan qızıqsınu bulsa, ikençese şähär çitendä üz yortı belän yäşäp yatuçı xucalıq keşese qızıqsınuı. Mart azağında qulğa köräk alıp qar çistartırğa, yul açarğa turı kilä. Atna başında ike täwlek diärlek yueş qar yawdı häm erep betä almadı. Qayçan erep betär bu qar, yulnı su basmasmı? Kiñäşmädä dä berençe itep süz respublikanıñ Gidrometeorologiä idäräse başlığı Sergey Zaxarovqa birelde. Ul süzen hawa şartların farazlağanda barı tik Gidrometeorologiä idäräseneñ mäğlümätlärenä genä nigezlänergä genä çaqırudan başladı. Alaysa qayber gazetalar soñğı könnärdäge hawa torışına qarap nindider qurqınıç farazlar birä başlağannar ikän. Sergey Zaxarov bıyılğı qışnıñ ğädättägedän qarlı bulmawı turında mäğlümätlär kiterde. Yılğalarda su kütärelüdä ğädättägeçä aprelneñ berençe atnasında kötelä. Läkin çığışınıñ azağında ul mondıy yoqlata torğan faraznı qapma qarşığa bordı... Şulay itep tınıçlanırğa irtäräk äle. Soñğı ike täwlektä genä aylıq norma qar yawğan. Arçadağı respublikanıñ iñ borınğı häm iñ ışanıçlı Çulpan meteostansiäse 16 santimetr qar yawğanıñ terkäp quyğan. Könnärneñ salqın toruında isäpkä alsañ yazğı taşu wäzğıäteneñ bik qatlawlanıp kitüe ixtimal. Şundıy yomğaqlawdan soñ kiñäşmädäge wäzğıättä citdilänep kitte. Citmeşençe yıllar azağında Apas rayonındağı su basunı, taşuda keşelär mal-tuar häläk buluın iskä töşerdelär. Tatarstannıñ 39 rayonında su basu qurqınıçı yanağan 349 awıl häm bistälär bar ikän. Ul urınnarda 47 meñ keşe yäşi. Kiñäşmädä tieşle oyışmalar häm xezmätlär menä şul xalıqnıñ iminlegen tä'min itü çaraları xaqında xisap tottılar.
Yunıs Ätnäle.
