Accessibility links

Кайнар хәбәр

Xalıqnıñ üz şağire


Robert Miñnullin xalqıbız öçen yäşi torğan mäşhür şağirlärneñ berse. Üz milläteneñ ulı bularaq, ul tormışıbıznıñ dürt möstäkıyl' ölkäsendä: tabiğättä, xezmättä, icatta, parlamentta da üzeneñ närsägä sälätle buluın rasladı. İñ ähämiätlese, ul bezgä tatarnıñ qaysı yuldan barıp, niçek yäşärgä tieşlegen üz misalında kürsätä. Robert abıynıñ şiğerläre dä bar xalıqqa añlayışlı. Çönki alar ğadi xalıq telendä yazılğan, alar bik mäğnäle, canlı, moñlı. Şuñadır da 29nci martta Piramidada ütkän şağirneñ icat kiçäsen xalıq tulı zal belän qarşı aldı. Xalıq şağire Robert Miñnullinnıñ cırların törle yäştäge cırçılar bik yaratıp başqara. Anıñ şiğerlärenä yazılğan cırlarnı Zöhrä Säxäbieva, Rimma İbrahimova, İdris Gaziev, Aydar Galimov, İl'nar Säyfiev, Liliär kebek populyar cırçılar başqaruında işetep bula. Küp kenä yäş başqaruçılar anıñ “ozın ğömerle” şiğerläre aşa xalıq arasında tanılalar. “Talbişek”, “Änkämneñ doğaları”, “Sin ülgänçe mine sağınırsıñ”, “Änkäy”, “Äbilär çuağı” häm başqa bik küp cırları inde çın xalıq cırlarına äylände. Robert abıynıñ küñelendä tuğan cırlarnı tıñlawı bik ciñel dä tügel, çönki alar bik ixlas häm tormış çınbarlığın taswirlıy. Ä tormışta awırlıqlar da baytaq bit. Ämma läkin şağir bezgä şuşı qatlawlı tormışıbızda da maturlıq, saflıq, miherbanlılıq sıyfatların kürergä öyrätä. Yaratırğa öndi! Monnan 55 yıl elek Başqortstannıñ İleş rayonı Näcäde awılında tuğan bu iskitkeç sabır häm ğadi keşeneñ icatında tuğan yaqqa, tuğan awılına, änkäsenä, Klara xanımğa, ğomumän xalqına bulğan zur mäxäbbäte bik nıq çağıla. Üzen ul Sön qoşı dip atıy, bezneñ öçen ul çın täqwa, moñ çişmäse.
Robert Miñnullinnıñ mullı icatınıñ kiçäse çın bäyrämgä oxşap tordı. Söykemle cırları öçen şağirneñ qärdäşläre, dusları, icattaşları, ğomumän böten xalıq Robert abıynı cılı aqqoşlarğa, çäçäklärgä “kümep”, bik yaqın itep qabul itte. Üzeneñ çığışında şağir xalıqqa bulğan xislären, teläklären, ömetlären şiğerläre belän citkerde.
Soñğı yıllarda estrada bik zur tänqitkä elägä, ämma xalıq canlı Robert abıynıñ şuşı kiçäse başqa fikerlär tudırır dip ömetlänäse kilä.
Robert Miñnullin üzeneñ bäxetle bulırğa tieşlegen raslap yäşi! Çın bäxet ul – mal da, baylıq, dan da tügel! Çın bäxet ul – şağirlär bäxete, alarnıñ üze häm xalqı yazmışındağı bulğan ärnü-yaralarnı yöräge aşa uzdırıp däwalawı, yäşäwneñ yaqtı bötenlegen tabuı! İcatta kürä ul bäxetne şağir.
Al'bina Zäynulla, Qazan.
XS
SM
MD
LG