Litva parlamentı bügen küpçelek tawış belän prezident Rolandas Paskas'qa impiçment belderde. Paksas Litva konstitutsiäseneñ 3 maddäsen bozuda ğayeplänä. Atap äytkändä – üzeneñ kampaniäsenä aqça birgän Rusiä eşquarına Litva watandaşlığı birü, däwlät serlären saqlamaw häm privatizatsiägä qağılğan qararlar qabul itkändä basım yasawda ğayeplänä.
Här maddä öçen ayırım tawış birelde. İmpiçment belderer öçen 141 deputatnıñ 85 – xuplap tawış birergä tieş ide. Berençe häm ikençe maddä öçen "eye" dip 86 deputat tawış birgän, 3ne maddäne 89 keşe xuplağan.
Parlament riäse Arturas Paulauskas waqıtlıça prezident wazifasın ütiäçäk. Prezident saylawları 60 kön eçendä ütergä tieş.
Böten bu xällär uzğan atnada ğına NATOğa kergän häm kiläse ayda Yevropa Berlege äğzase bulırğa cıyınğan Litvağa külägä töşerä. Yevropanıñ ber ilendä dä prezidentnıñ impiçment belän urnınnan kitkände yuq ide äle.
