Sember ölkäse üzägeneñ 55-mäktäbendä şundıy uq çara uzdıru turında “Azatlıq” radiosı aşa xäbär bulğan ide. Cirle “Ömet” gäzite dä matur ğına yazma bastırdı. Çaranıñ mäğnäse häm eçtälege belän tanışqaç, başqa mäktäplär uqıtuçıları da şundıy kiçäne üz mäktäplärendä oyıştırunı sorağannar. “Tuğan tel” şuşı ğözerne ütäde. Bu yulı da çaralarnıñ töp maqsatı häm mäğnäse tatar teleneñ nindi qamil, bay, qısqa buluın anıq misallarda kürsätü ide. Läkin qayber üzençäleklär dä buldı.
Berençe yañalıq – tatar balalarınıñ isemnärenä qağılışlı. Här balağa, tanışabız dip, isemnären äytergä häm anıñ mäğnäsen añlatırğa quşıldı. Ğädätkä kergän mäğrip illäre isemnären añlatuçılar tabılmadı. Ä tatarça isem yörtkännäre şuşı yarışta da östälmä ballarğa xuca buldılar. 28-mäktäptä bitaraf çıraylı yäki pışıldaşıp utıruçı balalar da küzgä çalındı. Monı arığanlıq dip sanap, äñgämäne canlandırıp cibärü öçen, berniçä uyın da täqdim bu itelde. Bersennän özek tä kiterik inde.
Bezne cırlarğa öyrätä mäktäplärdä apalar- Ana telendä cırlıybız BEZ MALAYLAR!!! BEZ QIZLAR!!! Bu “yarışta” qızlar ciñde – köçleräk qıçqırdılar. Här sıynıfnıñ yaratqan cırı bar ikän: yalğız cırlardan soñ, alar da başqarıldı. Tik bitaraf utıru arığanlıqtan tügel ikän – tatarça añlap betermäwdän. Çaradan soñ şuşı turıda uqıtuçılar, milli xäräkät aktivistları häm mäktäp citäkçelege arasında fiker alışu buldı. Süz, nigezdä, 90-yıllar başında ölgäşkän uñışlarnıñ sülpänäyue, cirle avtonomiäneñ teşsezlege, yäş ata-analarda milli üzañnıñ sünüe säbäpläre, alar arasında eş alıp baru turında bardı. Älbättä inde, küptän ölgergän ayırım mäktäp açu mäs’äläse iğtibar üzägendä buldı. 28-mäktäp uquçıları şähärdä yäşäwçe ğailälärneñ 3-nse, 4-nçe buını inde. Ä Yaña şähärdä – älegä 2-nçe genä buın. Şunlıqtan anda balalar yaxşıraq ana telendä aralaşa. Yarışnıñ barışı da şunı kürsätte.
“Azatlıq” radiosı, Ayrat İbrahim, Sember.
