Yaponiäneñ Ğiraqtan ğaskärlärne çığaruın taläp itep bügen xökümät binası qarşına 600läp keşe cıyıldı. Uram cıyınında qatnaşuçılar premyer-ministr Junichiro Koizumi'nı 3 yapon keşesen totıq itep alğan suğışçılarnıñ taläben ütärgä, xärbi köçlärne Ğiraqtan çığarırğa çaqırdı. Ämma Koizumi, terrorçılarnıñ taläplären ütäw plannarı yuq, dip belderde.
Ğiraqta totıq itep alınğan kimendä 13 çit il watandaşı arasında 3 yapon da bar, alarnıñ berse – xatın-qız. Şulay uq totqınnar arasında Kanada häm İsraeldän ike ğaräp keşese, 7 Könyaq Korea watandaşı – xristian missionerları bar. Könyaq Koreanıñ tışqı eşlär ministrı Ban Ki-Moon korealılarnı Ğiraqqa barmasqa çaqırdı: "2004nçe yılnıñ 9 aprilennän başlap Ğiraq - ayırım bilgelängän ber il bulıp tora häm anda barırğa telägän Könyaq Korea watandaşları, säfärläreneñ imin şartlarda uzuı öçen – xökümätkä möräcäğät itergä tieş" dide Könyaq Korea tışqı eşlär ministrı.
Könyaq Korea Ğiraqqa amerikan citäkçelegendäge koalisiägä yardämgä 3 meñ 600gä yaqın ğaskär cibärü plannarın ğamäldän çığarmıy.
