Däwlät Şurasınıñ yaña çaqırılış deputatları nıqlap torıp eşkä kereşte. 15 aprildä, parlamentta ber yulı 4 komissiäseneñ utırışları bulıp uzdı. Yaña deputatlarğa, iñ berençe çiratta, aldağı çaqırılış miras itep qaldırıp kitkän, qanunnar östendä eşlärgä turı kiläçäk. Yaña saylanğan deputatlarnıñ eşläw därte köçle äle. Aktual temalarğa fiker alışalar, yaña qanunnar täqdim itälär. Mäsälän, sotsial säyäsät komissiäse utırışında şulay buldı. Firqä isemlekläre belän saylanğan deputatlarnıñ äle täcribäläre citep betmi, şuña utırış başında, komissiä räise, reglamenttan özeklär kiterep, deputatlarnıñ xoquqların häm fiker belderü tärtiben iskä töşerde. «Cirle üzidarä oyışmalarına däwlät xakimiätneñ qayber wazifaların birü turındağı qanun 1nçe häm 2nçe uqılışta aldağı çaqırılış deputatları tarafınnan qabul itelgän bulsa, anı 3nçe uqılışta qaraw häm qabul itü - xäzergelärenä turı kilä.
«Berdäm Rusiä» firqäsennän saylanğan deputatlar, xalıqnıñ sotsial tormışın qayğırtqan bulıp, yätim balalar, minimal eş xaqı, toraq-komunal reforma turındağı mäs’älälärne kütärep, qanunnar qabul itärgä täqdim itte. Deputatlarnıñ eş tärtiben äle belep betermäw säbäple, reglament adım sayın bozılıp tordı, çığışlar ozınğa kitte.
Utırışınıñ axırına deputatlar şaqtıy ardı häm «Yäşlär palatasın buldıru» turındağı möhim mäs’äläne tikşerep tormıyça, östän-östän genä qarap çıqtı. Şulay itep, komissiä Däwlät Şurasınıñ kiläse utırışına, «Yäşlär palatasın buldıru» turındağı qararnı kön tärtibenä kertergä täqdim itte. Däwlät Şurası yäşlär qanatın buldıru turında qararnı qabul itsä, şuşı «Yäşlär palatasın» oyıştıru eşläre başlanaçaq. Rayonnardan berär wäkil saylanaçaq häm ictimaği-säyäsi oyışmalardan da, berär keşe täqdim iteläçäk. «Yäşlär palatası»nıñ parlament aşa uza torğan qanunnarğa yäşlär küzlegennän qarap, bäyä birergä, iñ möhime, byudjet aqçasın bülgändä dä, üz fikerlären belderergä mömkinlege bulaçaq.
Bikä Timerova.
