Accessibility links

Кайнар хәбәр

İzrael höcümendä Hamas yulbaşçısı Abdel Aziz Rantissi üterelde


Kiçä Hamas yulbaşçısı Abdel Aziz Rantisi''nıñ İzrael höcümendä hälak bulğanınnan soñ Hamas suğışçıları monıñ öçen İzraeldän üç alaçağın belderde. Hamas äğzaläre bügen Gaza şähärendä Rantisi üleme häm 22 martta şulay uq hälak bulğan Hamasnıñ ruxi yulbaşçısı Şeix Äxmäd Yassin ülemnärenä cawap itep intixar höcümnäre başlıybız, digän uram qağäzläre tarattı. Kiçä Rantissi utırğan maşinağa İzrael boralağınnan raketa atıldı. Qatı cärähätlär alğan Hamas citäkçese Gaza şähäreneñ xastaxanäsendä ülgän. İzrael ministrı Gideon Ezra, Hamasnıñ Damasktağı säyäsi şurası başlığı Xaled Meşaal''nıñ da näq şundıy uq yazmış kötä, dip belderde. Hamas belderüendä oyışmağa yaña citäkçe bilgelände, dielä ämma anıñ iseme äytelmi. Xalıqara cämäğätçelek Rantissi''ğa yasalğan höcümne kisken täñqitläp çıqtı. BMO general sekratare Kofi Annan, Rantissinıñ üleme "bolay da kierenke bulğan wazğiätne tağın da qatlawlandıraçaq", dip borçılu belderde. Annan İzraelne üterü ğamällären tuqtatırğa çaqırdı. Yevropa Berlegeneñ tışı säyäsät başlığı Javier Solana höcümne "qanunsız" dip atadı. Britaniä tışqı eşlär ministrı Jack Straw Rantissi''nı üterü - "qanunsız, ber säbäpsez häm faydasız" dide. Waşington İzraelgä täñqit beldermäde, ämma Yaqın Könçığıştağı wazğiät borçılu tudıra häm İzrael üz ğamälläreneñ näticäsen añlarğa tieş, dide. Aq Yort belderüendä şulay uq Hamas – terrorçılar oyışması häm İzraelneñ üz üzen yaqlarğa xoquqı bar, dielä. Fälestin ministrı Ğassan Al-Khatib, Rantissi''nıñ üleme öçen Quşma Ştatlar da cawaplı, çönki äle genä Amerikan prezidentı George Bush''tan moña xuplaw buldı, dide: "İzraelneñ bu höcümne oyıştıru waqıtı küpmeder däräcädä şik uyata, çönki höcüm Şaronnıñ Waşingtonnan qaytuınnan soñ uq buldı. Häm bu säfärdän soñ bez Amerika İzraeldä uñ köçlärneñ säyäsäten yaqlıy digän fikerdä qaldıq. Yaqlaw isä uñçılar xökümäteneñ fälestinnärgä qarşı köç qullanu telägen arttıraçaq qına," dide fälestin ministrı. Al-Khatib süzlärenä qarağanda Rantissi''nıñ üleme Yaqın Könçığış nizağın tağın da tiränäytäçäk. Ämma İzrael tışqı eşlär ministrlığınıñ matbuğat wäkile Jonathan Peled, Rantissi''nı üterü – İzraelneñ üz üzen yaqlaw maqsatında eşlängän legal ğamäl buldı, dide: "İzrael terrorğa qarşı köräşne däwam itergä mäcbür. Häm höcümdä – qulları qanğa batqan, yözlärçä yähüdneñ ülemenä säbäp bulğan terror ğamälläre oyıştırğan häm İzraelgä qarşı tağın intixar höcümnäre planlaştırğan, terrorçılarnıñ Hamas oyışması citäkçese üterelde. Fälestin xakimiäte terrorğa qarşı köräş öçen barmağın da selketmägändä İzrael bu köräşne üze alıp baraçaq," dide İsrael tışqı eşlär ministrlığı wäkile. Ğaräp illäre Ligası Rantissi''ğa bulğan höcümne "İzrael tarafınnan qılınğan terror höcüme" dip atadı. Alsu Qormaş
XS
SM
MD
LG