Räşit Wahapovnı belmägän tatarlar bik siräkter. Läkin anı belüçelär häm milli muzıkanıñ qäderen añlawçılar - ölkän yäştäge keşelär. Ä yäşlär häm urta buın xalıqçan häm klassik cırçını belmäsä - bu cırçınıñ da, ğomumän tatar sänğäteneñ dä yuğala başlawı digän süz. Räşit Wahapov festivalen oyıştıruçılar - Tatar kongressı, Tübän Novgorod tatarlar cämğiäte, Tatarstan jurnalı redaksiäse festival'neñ berençe könennän ük onıtıla başlağan mäşhür cırçını xalıqqa kire qaytardılar.
Çärşämbe kiçendä Tinçurin teatrı binasında 4 säğät yarım barğan kiçädä Rifat Fättäxovnıñ Räşit Wahapov turındağı kitabındağı dokumentlar, xatirälär, räsemnär ekranda kürsätelde, cırçınıñ tawışı xäzerge tatar başqaruçılar belän bergä aralaştırılıp yañğıradı, säxnädän cırçı turında istäleklär söylände. Räşit Wahapovnıñ ätise, änise, cırçı häm anıñ tormış iptäşe, xätta anı yaqtı dönyadan irtä alıp kitkän äcäl obrazların başqarğan artistlar - barısı da çınnan da Räşit Wahapov böyek milli cırçı, tatar estradasına nigez saluçı ikänlegen aqılğa da, yöräkkä dä señderde. Festival'neñ açışında Däwlät Sovetı räise Färit Möxämmätşin dä qatnaştı.
İskä qalğan häm teträndergän mizgellär küp buldı. Menä alarnıñ qayberläre. Cırçınıñ yaqtaşları - Tübän Novgorodtan kilgän buldıqlı, talantlı keşelär - üzläre ber milli ğawam bulıp, zur zäwıq belän çığış yasadılar. Wahapov belän bergä säxnädän cırlağan İlham Şakirov, Cäwhirä Säläxova, Färidä Kudaşeva häm başqa yoldızlarnıñ nurı, Zilä Sönğätullina, İdris Ğäziev, Zöhrä Säxäbieva, Rafail İl'yasov, Röstäm Malikov kebek urta buın cırçılarnıñ çın milli rux belän xalıqçan äsärlärne başqaruı zalda küptän sağındırılğan tatar hawasın, tatar ruxın xasil itte. Bügenge estrada, şou-biznes yoldızları säxnädä kürenmäde diärlek. Şulay da, 3 yegetneñ ber-berse belän yarışıp, xalıqçanlıqta Räşit Wahapovqa oşatırğa tırışıp cırlawı qızıqsınu uyattı. Yaña ğına säxnägä çıqqan Aydar Ğäbdninov, İlüs Ğäynanşin häm Salawat moñlı tawış, tıynaq totışları belän Wahapovqa tabınğannarın rasladılar.
Festival' açılışında Räşit Wahapov isemendäge ör-yaña büläk - maxsus medal' häm 1 meñ dollar aqça anıñ berençe lawreatına - milli sanduğaçıbız Färidä Kudaşevağa tapşırıldı. Bu kiçä häm festival'neñ dekabergä qädär barışı, mäclestä şaqtıy yış yañğırağan Rifat Fättäxov häm başqa fidaqär nijgarlılarnıñ isemnäre turında söyläwlär, bäxäslär tağın bulır äle. Cırçı turında zatlı kitap, Räşit Wahapov tawışı yazılğan lazer tälinkäse häm audiokasseta şuşı matur kiçädä şığrım tulı zalğa cıyılğan tamaşaçılarğa ğına tügel, böten tatar xalqına bu qäderle cırçını yañadan qaytardı.
Rimzil Wäli
