Accessibility links

Кайнар хәбәр

Tönyaq Koreada bulğan timer yul qazası bu ilneñ dönyağa açıluına kitererme?


Täwlek uzuğa Tönyaq Korea räsmiläre, nixayät, tınlığın özep, atnakiç könne zur timer yul qazası bulğanın tanıdı.

Qotqaru eşläre öçen cawaplı Cañ Soñ Gun süzlärençä, Yoñçon stansiäsendä bulğan şartlaw näticäsendä 154 keşe xäläk bulğan, 1300-e yaralanğan. Nitrat aşlaması töyägän trän neft töyägän ikençe trän belän bärelep, elektr çeltärenä orılğan, näticädä köçle şartlaw yañğırağan. Korea räsmiläre monıñ säbäben "ğämsezlek" belän añlattı.

Dönyanıñ berniçä ile Pxenyanğa yärdäm täqdim itte. Şimbä könne Könyaq Korea ministrı Coñ Se Hun 1 million dollar aşığıç yärdäm täqdim itte:

Audio (Coñ Se Hun)

"Könyaq Kore xökümäte Qızıl Xac oyışması aşa 1 million dollar külämendä aşığıç yärdäm, medikamentlar cibärä."

Qıtay şulay uq 1.2 million dollar külämendä aşığıç yärdäm wäğdä itte. Quşma Ştatlar da yärdäm itergä teläk belderde. Däwlät departamentı wäkile Richard Boucher bolay dide:

Audio (Richard Boucher)

"Bez elek tä Tönyaq Koreağa humanitar yärdäm kürsättek, moña ber kirtä dä yuq. Xäzer närsä kiräk häm bez närsä birä alabız, şunı qararğa kiräk."

Äle genä Tönyaq Koreadan qaytqan İrlandiäneñ humanitar oyışma xezmätkäre Anne O''Mahony süzlärençä, bu il andıy zur qazalar belän eş iterlek xäldä tügel:

Audio (Anne O''Mahony)

"Sälämätlek saqlaw sisteması bik zäğif xäldä. Anda bernindi daru, cihazlar yuq. Täcribäle tabiplar küp, ämmä alarnıñ eş itü qoralları yuq."

Yartı ğasırdan artıq dönyadan yabılıp yäşägän bu il, çit illärdän yärdäm ezlämäde. Bügen räsmi Pxenyan, qayğı urtaqlaşqan häm yärdäm täqdim itkän öçen, xalıqara cämäğätçelekkä räxmäten belderde.

Qayber küzätüçelär fikerençä, bu qaza Tönyaq Koreanıñ dönyağa açıluına kiterä ala. Anda 2 yıl eşläp qaytqan alman tabibı Norbert Vollertssen, bu qazanı, Sovetlar Berelgeneñ açıluına kitergän, Çernobıl qazası belän çağıştırdı.

Ali Gilmi, Praga
XS
SM
MD
LG