Accessibility links

Кайнар хәбәр

Başqortstanda Germaniä könnäre başlandı


14 mayda Başqortstanda Germaní könnäre başlandı. Mäğlüm ki, bıyılğı yıl Rusiädä Almaní mädäniäte yılı dip iğlan itelgän ide. Başqortstandağı könnär dä şul yıllıq programınıñ «Alman yazı» dip atalğan bäyräm çaralarına asäsan oyıştırıldı. Başqortstanda tögäl ber atna däwam itäçäk şuşı tantanalarnı räsmi açu öçen 17 may könne Ufağa Almanínıñ Rusiädäge ilçese Xans Fridrix fon Plets citäkçelegendäge räsmi wäkillek kilä. Wäkillek eçenä törle hönär iäläre, cämğese yözdän artıq keşe keräçäk dilär. Qunaqlar Başqortstanda Germaní könnäre qısalarında bixisäp çaralarda qatnaşaçaq. Ä mädäni çaralar çınlap ta bixisäp. Almaní könnäre qısalarında ütkäreläçäk waqíğa – çaralar berniçä öleşkä, atap äytkändä iqtisadí, ğomumí belem birü, yäşlär häm mädäniät yünäleşlärendäge çaralarğa bülengän.

13-endä ük inde almannarnıñ ber törkeme Ufağa kilep citte. Bäyrämgä kilgän alman qunaqların Başqortstan prezidentı Mortaza Räximov häm başqa yuğarı citäkçelär qabul itep, täwge söyläşülären ütkärde. Ä köndez Almanínıñ Rusiädäge ilçelegeneñ berençe sekretare Yäsper Wik äfände Ufada «Başinform» mäğlümat agentlığında jurnalistlar öçen matbuğat oçraşuı oyıştırdı. Kiçen Ufa üzägendäge bik matur «Kärwansaray» säwdä – yal üzäge aldındağı mäydanda «Bez bergä» dip isemlängän zur forum ütä. Anda Almanídan kilgän qunaqlar da, Başqortstanda yäşäwçe almannar da qatnaşa.

Aldağı könnärdä Başqortstanda Almaní könnäre qısalarında bik küp oçraşular, mädäni çaralar, eşlekle söyläşülär qaralğan. Aldağı ber atna Başqortstanda «Alman kuxnásı, alman aş – suları» atnası dip iğlan itelde. Ufadağı «Rodína» kinoteatrında isä «Alman kinosı» atnalığı açıldı. Şulay itep ber atna däwamında alman sıraların eçep, alman rizıqlarınnan awız itep, alman kinoların qarap räxätlänäçäk başqortstanlılar.
XS
SM
MD
LG