Bu könnärdä Yekaterinburg şähäreneñ Tınıçlıq häm Duslıq yortında “Amerikada mäçetlär arxitekturası” dip atalğan fotokürgäzmä açıldı. Kürgäzmäneñ avtorı – islam arxitekturası proyektı citäkçese, professor Omar Xalidi.
Açılu tantanasında Amerika Quşma Ştatlarınıñ Yekaterinburgtağı general' konsulı Skott Roland, ilçelek wäkile Devid Marks, Sverdlov ölkäse gubernatorı xakimiäte xezmätkärläre, törle milli häm dini oyışmalar wäkilläre, jurnalistlar qatnaştı. Tantana izge qor’än süze häm il-köngä tınıçlıq teläp qılğan doğa belän başlanıp kitte.
Qunaqlarnı sälämläp general' konsul Skott Roland äfände çığış yasadı. Üzeneñ çığışında ul Amerikada yäşäwçe möselmannar tormışı, mäçetlär tarixı turında söyläp ütte. Anıñ äytüençä, bu köndä Amerikada 2500 tiräse mäçet isäplänä. Alarnıñ kübese törle binalarda urnaşqan. Çın mäçet formasında salınğannarı 115. Älege mäçetlärneñ arxitekturası Yaqın Könçığışnıñ borınğı kul'turasın xäterlätsä dä, amerikan stilenä yaraqlaştırıp tözelgän.
Skott Roland Amerika möselmannarınıñ üz ğöref-ğadätlären bik tirän, qäderle itep saqlawların äytep ütte. Tolerantlıqnı saqlawnı xalıqara terrorizm belän köräşüdä bik ähämiätle çara dip atap, konsul xökümät tarafınnan Amerika möselmannarına üz dinnären saqlaw öçen barlıq şartlar da tudırılğanlığın assızıqladı.
Annan soñ cıyılğan qunaqlar iskitkeç küptörle, üzençälekle, bay arxitekturağa iä bulğan mäçetlär fotokürgäzmäsen iğtibar belän qaradılar. Kiçä tügäräk çäy östäle yanında, cılı, dustanä äñgämä belän tämamlandı.
Fäwiä Safiullina.
Yekaterinburg.
