Accessibility links

Кайнар хәбәр

Qazanda yäşüsmerlär arasında cinayätçelek mäs’äläse tikşerelde


21 may könne Tatarstan Däwlät Şurasınıñ Prezidium utırışı uzdı. Anda respublika parlamentınıñ çirattağı utırışı 3 iyüngä bilgelände. Şulay uq Prezidium cıyılışında sessiädä qaralaçaq sorawlar da raslandı. Barısı kön tärtibenä 48 mäs’älä kertelde. Alar arasında Cirle üzidarä, däwlät milken privatizatsiäläw turındağı qanunnarnıñ proyektların tikşerü, Cir kodeksına üzgäreşlär kertü kebekläre dä bar. Şulay uq deputatlar 2004 yılda parlamentara xezmättäşlek programmasın da tikşerergä niätlilär. Xäyer, deputatlar sessiälärdä genä tügel, ä alar arasında da eşlären tuqtatmıylar. 20 mayda Däwlät Şurasınıñ byudjet, salımnar häm finanslar buyınça komitetınıñ utırışı buldı. Anda Tatarstannıñ Finans ministrı Radik Ğayzatullin deputatlarğa 2004 yılnıñ berençe kvartalında respublika byudjetınıñ ütäleşe xaqında mäğlümätlär birde. Anıñ süzlärenä qarağanda, Tatarstanda salımnar cıyu planlaştırılğannan äybäträk barsa da, respublika qaznasına kötelgännän azraq kergän. Çönki federal’ üzäk üzenä digän aqçalarnı cıyıp ala, ä üze tieşlesen cibärep betermi ikän. Bu aqçalar barı tik aprel’ ayında ğına kilä başlağan.

Comğa könne Qazanda tağın ber bik möhim cıyılış uzdı. Ul respublikada yäşüsmerlär häm baliğ bulmağan balalar problemasına bağışlandı. Balalar mäs’äläse Tatarstanda bik yış kütärelep, inde 10 yıl däwamında Yäşlär programması eşläp kilügä dä qaramastan, respublikada da yäşüsmerlär arasında cinayätçelek arta, suqbay balalarnıñ sanı da äzäymi. 21 mayda ütkän cıyılışta şuşı häm başqa problemalarnıñ säbäpläre, alarnı çişü yulları tikşerelde. Bu söyläşüne Eçke eşlär ministrlığı oyıştırdı. Anıñ eşendä respublika premyer-ministrı urınbasarı Zilä Wälieva dä qatnaştı. Şulay uq comğa könne balalar teması Bötendönya tatar kongressı binasında da kütärelde. Anda Qazannıñ balalar häm Yäşlär eşläre buyınça komitet citäkçese Al’bert Bikmullin häm başqalanıñ Mäğärif idäräse başlığı urınbasarı Tatyana Ponomareva jurnalistlar öçen matbuğat oçraşuın uzdırdılar. Älege çara Xalıqara balalarnı yaqlaw köne uñayınnan ütkärelde, dip xäbär itä İntertat.ru gäcite.

Gölnaz İlgizär

XS
SM
MD
LG