Accessibility links

Кайнар хәбәр

Tatnet: bulmas.ru xäbärçelärne xezmättäşlekkä çaqıra


Tatarlar global çeltärdä üz öleşen buldırırğa teli. Rusiä internet gäzitläre menä şundıy mäqälälär bastırdı bu atnada. Tatarstanda ütä torğan Media-forum qısalarında İnternetnıñ tatar öleşen üsterä torğan keşelär oçraştı. Älege cıyılışnıñ kön tärtibendä «Tatar internetı» xalıqara oyışmasınıñ räsmi töstä oyıştıru, «Tatnet yoldızları» bäygeseneñ nigezlämäsen qabu itü kebek citdi mä’sälälär kertelgän ide. Şulay uq, Tatarstanğa üz domenın buldıru kebek tema da älege cıyışta qatnaşuçılarnıñ iğtibarın cälep itte. Saytlar xucalarınıñ kübese tatarlarğa üz domenı kiräk, digän fikerdä tora häm älege cıyışta da, internetta illärgä öleş bülep birä torğan xalıqara oyışmağa möräcäğät itärgä kiräk, dip täqdim kertüçelär buldı.



Ölkänräk yäştäge internetçılar isä, domen alırbız da, anı närsä belän tutırırbız ikän, dip qarşı dälil kiterä. Saytlar sanı küp tügel, alar arasında tatar telendäge säxifälärneñ sanı tağı da azraq.



18 mayda oyıştıru cıyılışın uzdırğan xalıqara «Tatnet oyışması» kiläçäktä, Tatarstan xökümätendä tatar domenı alu turında möräcäğät itärgä cıyına. Bu xaqta bezgä älege oyışmanıñ idärä äğzäse Älfiä Miñnullina xäbär itte. Süz .TS digän berençe däräcäle häm .TAT – ikençe däräcäle domen turında bara. Bolar äle proyektlar ğına, ä xäzergä tatar internetın üsterergä teläweçlär aldında tatar xärefläreneñ çeltärdä döres itep kürenüe, tatarça xatlaşu, tatar säxifäläreneñ sanın arttıru mäs’äläläre tora. Bögelmädäge rayon gäzitendä eşläwçe millättäşebezneñ bu xaqtağı fikeren işettergän idek inde. Jurnalist Färit Şäfiğullin, törle säxifälärdä törle-törle xäreflär, kodlar bulğanğa kürä, säxifädäge yazular tulısı belän kürenmi, tatar xärefläre kergän süzlär uqılmıy, dip zarlanğan ide. Ul internetçılar cıyılışında berdäm sistemağa kilergä täqdim itkän ide. Ämma sayt xucalarınıñ kübese andıy fikerne xuplamıy, çönki här qaysısı üzeneken döresräk dip sanıy



Tatarlar.ru bu atnada ber yañalıq tarattı. Dönya küläm bilgele Google.com ezläw säxifäse tatar saytların äzlätep tabu mömkinlegen birä başlağan. Anıñ öçen google.com internet säxifäsenä kerep, häm tatarça häm kurilça teläsä nindi süzne kertergä kiräk. Yañalığı monıñ şunda: elek tatar internet säxifäläreneñ adresların, tatar süze kergän urıs telle saytlar aşa ğına tabıp bula ide. Ä xäzer google.com tatar xärefläre belän yazılğan web-bitlärne dä ezlätä. Şulay uq, yaña çıqqan Windows XP programması da tatar xäreflären üz itä, anda şriftlarnı kertep, tatarça Word dokumentında yazıp bula.

Bu atnada yaña açılğan bulmas.ru küñel açu saytın kiñ cämäğätçekkä täqdim itü buldı. Bulmas.ru säxifäse başqa internet saytlar kebek mäğrifätçe wazifasın üz östenä alırğa qıymıy. Bu säxifä – iñ berençe çiratta küñel açu, qızıq tabu öçen eşlängän. Bulmas.ru säxifäseneñ xucası – Ruzil Möxetdinov, xäbärçe - Rezidä Nurullina.

Ruzil Möxetdinov äle «Mäğärif» jurnalınıñ internet säxifäsen yasaw belän dä tanıldı. Bulmas.ru anıñ ikençe proyektı. Bulmas.ru saytı, xäbärlär, web-parad, sarı bit häm qunaqxanä büleklärennän tora. Web-parad digäne – iñ populär 10 cırdan tora. Berençe urında Cämilä Nizametdinneñ «Mäxäbbät yätmälärendä» digän cırı, 2nçe häm 3nçe urında Aydar Ğalimov belän Ğolnara Timercanova cırları tora. Bulmas.ru üzeneñ sarı bitendä ğäybätlär bastırırğa wäğdä itä, ä qunaqxanä bülege sayt qunaqları yazuların qaldırıp kitsen öçen eşlängän. Bulmas.ru avtorlarnı xezmättäşlek itärgä çaqıra, ägär teläsägez, mäqälälärne info@bulmas.ru adresına cibärä alasız.

Bikä Timerova.

XS
SM
MD
LG