Accessibility links

Кайнар хәбәр

25 may könne Tatarstanda 50 meñgä yaqın uquçı mäktäp belän sawbullaştı


25 may - Tatarstannıñ barlıq çığarılış klass uquçıları öçen zur bäyräm. Bügen alar öçen qıñğıraw tawışı respublikanıñ 50 meñgä yaqın 11 klass uquçıları öçen soñğı märtäbä yañğıradı. Awıl, şähärlärdä sişämbe könne aq bantlar taqqan qızlar, bäyrämçä kiengän yegetlär küp buldı. Bu könne uquçılar distä yıldan artıq bergä uqığan klasstaşları, mäktäp, uqıtuçılar belän, ä alarnı uqıtqan ostazları – niçä yıllar belem birgän uquçıları belän sawbullaştı. Mäktäp qıñğırawı soñğı märtäbä yañğırağanda 11 yıl däwerendä bulğan barlıq üpkälär, küñelsezleklär onıtıladır möğayın. Şuña da, älege bäyrämdä bäxetle yözlär, yäş arasınnan bulsa da yılmayular ğına küzgä çağıldı. Qazannıñ Mäskäw rayonında urnaşqan 2 gimnaziädä dä bäyräm bik matur, zurlap ütkärelde. Alar xätta mäktäp binası qısalarına ğına da sıymıyça, üzläreneñ bäyrämen Mädäniät yortında uzdırdılar. Läkin tantanalı öleş tämamlanğaç, barıber yañadan üzläreneñ yaratqan mäktäplärenä qayttılar. Äydägez äle 2004 yılda 11 klassnı tämamlawçı uquçılarnıñ üzlären tıñlap qarıyq.

Soñğı qıñğıraw bezneñ öçen bik zur häm matur bäyräm, läkin bu beraz sağışlı da bäyräm. Küp yıllar bergä uqığan duslar belän ayırılası da kilmi, läkin nişliseñ inde. Şuşı könne min klasstaşlarıma äybät kenä imtixannar birep beterep, telägän uqu yortlarına kerergä, matur ğailä qorıp äybät kenä yäşärgä, alarğa yaqtı kiläçäk telim

Uquçılardan ayırmalı bularaq, uqıtuçı ğömerendä Soñğı qıñğıraw bäyräme ber genä bulmıy. Alar yıl sayın bulmasa da, bik yış üzläreneñ balaları kebek yaqın kürgän uquçıların olı tormış yulına ozatalar. Läkin, şuña da qaramastan, uqıtuçılar da bu bäyrämdä qarşılıqlı xislär kiçerälär. Qazannıñ 2 gimnaziäseneñ tatar tele uqıtuçısı İlnar Hidiätovnıñ fikere.

Bez, uqıtuçılar öçen Soñğı qıñğıraw bäyräme ber yaqtan yaqtı, matur, şatlıqlı bulsa, ikençe yaqtan beraz moñsu da. Çönki bez bik yaqın keşelärebezne – uquçılarnı zur tormış yulına ozatabız. Alarğa üzläreneñ yulında telägännärenä ireşergä telim

Azatlıq radiosı da kiçäge uquçılarnı, bügen inde yaña tormışqa ayaq basarğa äzerlänüçe çığarılış klass uquçıların zur bäyrämnäre belän qotlap, alarğa kiläçäktä uñışlar teläp qala.

Gölnaz İlgizär

XS
SM
MD
LG