«İman» tatar yäşläre berlegeneñ idärä äğzaları mart azağında bulıp ütkän çirattan tış qorıltayında törle vuzlarda uquçı studentlarnı häm eşçe yäşlärne berläşterüne üzläreneñ maqsatı itep quydı. Äytergä kiräk, yäşlär bu maqsatlarına ireşü yulların ezlilär. Bu uñaydan alar Qazanda da bulıp, yäşlär oyışmaları belän aralaşıp, beraz täcribä dä tuplap qayttılar. İnde «İman» berlege äğzalarınıñ Qazanda «Yağımlı yaz» tatar studentlarınıñ festivalendä qatnaşıp, ciñüçelär isemlegenä kerep qaytuları xaqında «Azatlıq» radiosın tıñlawçılarına citkergän idek inde. Berlekneñ äğzaları ciñ sızğanıp eşkä köz aylarında başlarbız, anda inde fänni konferensiälär dä bilgelände, dini seksiä dä üzeneñ eşen nıqlap başlarğa äzerlänä, dip urtaqlaştı «İman» tatar yäşläre berlegeneñ räise Zöhrä Qasıymova. Ä menä bu atnada yäşlär tatarça diskoteka oyıştırıp, küñelle itep yal itkännär. Bu «İman» tatar yäşläre berlegeneñ yañartılğan idäräseneñ äle şähär külämendä uzdırılğan berençe çaraları, dip bilgeläp ütte Zöhrä Qasıymova.
—audio—
Zöhrä iyündä Qazanda uzaçaq böten tatar yäşläreneñ cıyınına da äzerlänäbez dip bilgeläp uzdı. İnde oyışmadan delegatlar saylanğan. Anda kübräk yuğarı uqu yortlarında uquçı studentlar saylanğan, eşçe yäşlär dä bar. Tik menä Qazanğa yäştäşläre belän aralaşırğa ber gene rayon wäkile dä barmayaçaq. Aktiv eşli başlağan Mojga, Glazov şähäre yäşläre turında onıtqannar älegä başqalada uquçı häm yäşäwçe oyışma äğzaları. Ämmä, Zöhrä süzlärençä, cäy aylarında yal itüne töbäklär belän bergä uylarğa, alarğa barıp, tanışırğa da niäte bar.
—audio—
Älbättä, yäşlärneñ aktiv eşçänlegenä kongressta qabul itelgän qararlar da yärdäm itär. Yäşlärneñ mänfäğätlären qayğırtuda, ixtiacların qänäğätländerüdä sponsorlar da tabılır, bügengä bay abıylarıbız yärdäm itärgä aşıqmıy, monı xäl itü öçen üzebez nindi bulsa da yullar tabarbız dip quydı Zöhrä Qasıymova.
Xämidä Ğäyfullina, «Azatlıq» radiosı, Udmurtiä.
