Respublika xalqı bu könnärdä Sabantuylarnı bäyräm itärgä äzerlänä. 5-6 yün, yal könnärendä Tatarstannıñ awıl-rayonnarında şuşı tatar milli bäyräme görläp uzaçaq. Hawa torışı bu arada ällä ni quandırmasa da, yañğır, cil häm salqınğa da qaramastan meñlägän keşe bu bäyrämgä barırğa cıyına. Xäyer, qayber awıllarda Sabantuynı inde comğa könne ük ütkärep quydılar. Respublika citäkçelege bu bäyräm uñayınnan da qotlaw süzläre citkerde. Sabantuynı bu könnärdä tatarstanlılar ğına bäyräm itmi. Mäsälän, şuşı könnärdä Sarıtawdağı, Volgogradtağı millättäşlärebez dä Sabantuyğa äzerlänä. Respublikanıñ Mädäniät ministrı İldus Tarxanov andağı tatarlarnı Tatarstan isemennän qotlarğa dip Volgogradqa kitte dä inde. Qazannıñ mädäniät, sänğät ostaları da töbäklärdäge häm Tatarstandağı Sabantuylarda qatnaşırğa äzerlänä.
Gölnaz İlgizär
