Accessibility links

Кайнар хәбәр

Tüpraş kompaniäse Tatneftneke bulırmı?


Qazanda kompyuterlar häm elemtä cihazların citeşterü buyınça iñ ere kompaniälärneñ berse – İntel kompaniäse wäkilläre bulıp kittelär. Kompaniäneñ Rusiädäge prezidentı Steve Chase respublikanıñ premyer-ministrı Röstäm Miñnexanov belän oçraştı, Elemtä ministrlığında ağımdağı yılda uq Tatarstannıñ berär rayonında İntel citeştergän yaña caylanmaların eşlätep qaraw mömkinlege xaqında söyläşte. Şulay uq respublika mäktäplären kompyuterlaştıru eşen kiñäytü yulları da tikşerelgän bu oçraşularda. Steve Chase süzlärenä qarağanda, alar xätta mondıy teläktäşlekne kötmägännär dä ikän. Yaqın kiläçäktä ikeyaqlı xezmättäşlek kileşüen tözü xaqında söyläşülär başlanırğa tieş.

Ä menä Tatarstannıñ Törkiä belän xezmättäşlege älegä bik kiñäyep kitä almıy. Küptän tügel genä Tatneft şirkäteneñ Tupras neft eşkärtü kompaniäsen satıp aluı turında şaqtıy küp söylägännär, kiläçäkkä bersennän-berse maturraq plannar qorğannar ide. Çönki Rusiädä neft tabu buyınça Tatneft altınçı urında torsa da, anıñ ber genä dä neft eşkärtü şirkäte yuq, dip xäbär itä Kommersant gäcite. Läkin küp waqıt ta ütmäde, satu-alu eşläre tärtibenä turı kiterep eşlänelmägän ikän, digän imeş-mimeşlär işetelä başladı. Xäzer inde menä bu süzlärneñ döreslekkä turı kilüe dä açıqlandı. Şuşı könnärdä genä Törkiäneñ Yuğarı mäxkämäse Tupras kompaniäsen satu buyınça tendernıñ yomğaqların döres tügel, dip iğlan itte. Mäxkämä eşen Törkiäneñ profsoyuz oyışması quzğatqan ide. Xäzer kompaniäne satu eşendä soñğı süzne Törkiäneñ xökümät wäkilläre äytergä tieş. Älegä bu xaqta Tatarstan xökümäte yäki Tatneft şirkäte wäkilläreneñ räsmi añlatmaları işetelmäde. İsegezgä töşerep ütik, yün başlarında Törkiädä ütärgä tieşle tatarstan könnäre näq menä şul uq Tupras firması xaqında barğan mäxkämä eşe arqasında kiçekterep torılğan ide. Xäzer inde bu çaranıñ qayçan uzaçağı turında bötenläy bilgesez.

Gölnaz İlgizär

XS
SM
MD
LG