Accessibility links

Sverdlov ölkäsendä tatar tele häm ädäbiät uqıtuçıları öçen oyıştırılğan maxsus fakultet eşen tämamladı


Sverdlov ölkäse mäğärif üsterü institutı nigezendä tatar tele häm ädäbiät uqıtuçıları öçen oyıştırılğan maxsus fakultet Ural töbägendä tatar mäğärifen üsterü öçen kadrlar äzerläw maqsatı belän Tatarstan mäğärif xezmätkärläreneñ belemen kamilläşterü häm yañadan äzerläw institutı yärdämendä monnan ike yıl elek eşli başlağan ide. İke yıl däwamında Sverdlov häm Çiläbe ölkälärennän biredä yegerme sigez keşe belem aldı. Bu eşneñ näticäse turında filologiä fännäre doktorı, professor, Rossiä gumanitar fännär akademiäse akademigı Flün Musin bik yuğarı fikerdä. Anıñ uylawınça, elek-elektän mäğrifätle töbäk bulıp sanalğan Ural tatarlarınıñ milli mäğärifen üsterü öçen nıqlı nigez buldırıldı.

İkençe yuğarı belem alu turındağı diplomnar uqıtuçılarğa tantanalı räweştä Yekaterinburg şähäreneñ Tınıçlıq häm Duslıq yortında tapşırıldı. Alar öçen bik quanıçlı da, dulqınlandırğıç ta waqiğa buldı bu. İke yıl däwerendä cide sessiägä kilep, ber ğailä kebek tuğanlaşıp, duslaşıp betkän iptäşlär belän ayırılışu moñsu da bit. Bu oçraqtan Miñsılu İjguzina üz xislären cır yulına da salğan. Tantana başlanğanda Miñsılu qızı Nazlığöl belän bergä bu cırnı cırlap ta birde.

Biregä cıyıluçılarnıñ ber-bersenä äytäse süzläre, büleşäse toyğıları küp buldı. Uqıtuçılar bu eşne başlap cibärep axırına qädär citkerüdä küp köç quyğan Sverdlov ölkäse mäğärif üsterü institutı metodistı Zäytünä Şäymöxämmätowağa bik zur räxmätlär belderdelär.

Tantanalı kiçä barışında Uraldağı tatar milläte, anı üsterü yulları, bu eştä uqıtuçılarnıñ role turında bik küp süzlär buldı. Ğomumän, uqıtuçılarnıñ alğa taba yañaça eşlärgä omtıluları sizelep tordı. Qazannan kilgän uqıtuçılarnıñ berse, Tatarstan mäğärif xezmätkärläreneñ belemen kamilläşterü häm yañadan äzerläw institutınıñ tatar tele häm ädäbiät laboratoriäse mödire, maxsus fakul''tetnıñ dekanı Sirinä xanım Trofimova üz xezmätläreneñ buşqa kitmäwenä ışanıç belderde.

Fäwiä Safiullina.Yekaterinburg.

XS
SM
MD
LG