Cäy citü belän, ata-analar aldına iñ ozın kanikullar waqıtında balalarnı qaya cibärergä, alarnı niçek yal itterergä digän soraw kilep basa. Xäzer balalarnıñ yalı yış qına alarnıñ ata-analarınıñ älege yal öçen küpme aqça tülärgä mömkinlegenä bäyle. Alay da, zur aqçaları, baylığı bulmağan tatarstanlılarnıñ balaları öçen dä respublikada bıyıl küp törle yal variantları qaralğan. Byudjettan älege eşkä 119 million, ä sotsial iminiät waqıfınnan 200 million sum bülenep birelgän. Mäğärif ministrlığı mäğlümätlärenä qarağanda, Tatarstanda bu cäydä 18 meñ lager eşliäçäk. Bu sanğa şähär yanındağı sälämätländerü, törle şirkätlärneñ häm mäktäplärneñ, balalar yortlarınıñ lagerları kerä. Barısı anda 120 meñnän artıq bala yal itär dip kötelä. Bu lagerlarğa 18-20 köngä balaların cibärü ata-analarğa 500-600 sumğa töşäçäk, çönki alar putevkanıñ nibarı 25 protsentın ğına tüliäçäklär. Bu xaqta bezgä respublikanıñ Cäy isemle üzägeneñ citäkçese Vera Kotsubinskaya xäbär itte. Şuşı aqçanı tüläp balaların cäyge sälämätländerü lagerlarına cibärergä telägän ata-analarğa rayon yäki şähär mäğärif büleklärenä möräcäğät itärgä mömkin.
Xäyer, balalar cäy aylarında yal itü belän genä tügel, ä belemnären arttıru, tabiğättä täcribä cıyu mömkinlegenä dä iä bulaçaq. Mäğärif ministrlığı yäşüsmerlär öçen maxsuslaştırılğan, profil’le smenalar oyıştıra. Mäsälän, respublikanıñ Ğädättäntış xällär ministrlığı belän berlektä 7 yünnän başlap Qazan yanında yäş turistlar häm qotqaruçılar lagerı eşli. Yül häm avgust aylarında şuşındıy uq profil’le smenalar ictimaği eşlär belän şöğellänüçe balalar, yäş ximiklar, fiziklar, biologlar, ekologlar häm yäş texniklar öçen ütäçäk. Möselman balaları da onıtılmağan. Alar öçen Tatarstannıñ Diniä Näzaräte Qazanıñ berniçä mäçetendä cäyge lagerlar oyıştıra. Tizdän Bolğar mäçetendä 9 yäştän alıp, 14 yäşkä qädär yäşüsmerlär ber ay däwamında dini däreslär alıp, islam dine röxsät itkän räweştä yal itä alaçaqlar. Şulay uq dini lagerlar tağın Qazanıñ Söläyman, Mädinä, Ğädel häm Märcäni mäçetlärendä eşliäçäk.
Älege lagerlarğa häm başqa cirlärgä bara almağan balalar mömkinlekläre bulsa, tuğan-tumaça yanına awılğa qayta ala. Monda alarnı mawıqtırğıç yal ğına tügel, ä sälämätlekne nığıtuçı fizik eşlär dä kötä. Busın da buldıra almağannarğa, qızu cäy könnären öylärendä ütkärergä turı kilä. Andıylar da şaqtıy. Citmäsä, şähär uramnarındağı qarawsız qalğan häm ata-anaları tarafınnan taşlanğan balalar da bar bit äle. Näq menä şular cäy könnärendä kisken genä kütärelä torğan balalar cinayätçelege häm balalar qatnaşlığında yul häläkätläre sanın kütärä dä inde. Cäy üzäge citäkçese Vera Kotsubinskaya süzlärenä qarağanda, respublikanıñ cäyge yalın oyıştırğanda bu balalar a iğtibardan töşep qalmağan. Sälämätländerü lagerlarında yal itüçelär arasında alar da bula ikän. Suqbay balalarnı yal itärgä sotsial yaqlaw büleklärendäge häm militsiädä terkälüçelärdän saylap alaçaqlar. Ä menä andağı isemleklärgä kermäwçelärneñ balalarnıñ cäyge yalı turında qayğırtuçılar älegä yuq.
Gölnaz İlgizär
