Başqortstannıñ här töbägendä başqort xalqınıñ milli batırı Salawat Yulayıvnıñ tuuına 250 yıl tuluğa bağışlanğan tantanalı çaralar başlanıp kitte. Xätta bıyılğı Sabantuy bäyrämnäre dä hämmä cirdä Salawat Yulayıv yübileye ruxında ütä. Milli bäyrämebezneñ bıyılğı proğrammaları näq menä Salawat Yulayıvnı iskä aluğa qorılğan mädäni çaralar belän tözelä. Şuşı atna azağında 12- 13 iyün könnärendä rayonnarda ütäçäk Sabantuylar da şuşı uq räweştä oyıştırılaçaq. Bıyıl xätta 12 iyün könne ütüçe Ufanıñ 430 yıllıq yübileye köne häm Rusiä bäysezlege köne dä nigezdä Salawat Yulayıv yübileyenä bağışlanğan bäyräm çaralarınnan toraçaq. Qısqası, barlıq bäyrämnär dä Salawat Yulayıvnı iskä alu, anı danlaw belän suğarılğan. Salawat Yulayıvnıñ tuuına 250 yıl tulu uñayınnan törle kitap näşriätlarında milli batırğa bağışlanğan baytaq kitaplar da dönya kürde. Menä bügen genä şundıy çirattağı basmanıñ isem tuyı bulıp ütte Ufada. Ul törek häm başqort tellärendä näşer itelgän «Başqort xalqınıñ milli batırı häm şağire» dip atalğan kitap. Älege basmanı TÜRKSOY oyışmasınıñ generäl direksiäse, Başqortstan Mädäniät häm milli säyäsät ministrlığı häm Başqortstan Yazuçılar berlege urtaq köç belän çığarğan. Kitapta Salawat Yulayıv xaqında küp sanlı mäqälälär, şiğerlär häm milli batırnıñ üz şiğerläre urın alğan. Kitapnıñ törek telendä dä äzerlänüye başqortnıñ milli batırın Törkiädä häm başqa törki respubliklarda da kiñräk tanıtu mömkinlegen biräçäk dip isäpli, anı näşer itüçelär. Salawat Yulayıvnıñ yübileyenä bağışlanğan iñ töp çaralar 19 iyündä milli batırnıñ tuğan yağı Salawat rayonında zur cıyın sıyfatında ütäçäk. Anda Rusiäneñ törle töbäklärennän häm Estoniädän baytaq qına qunaqlar da kötelä.
