Accessibility links

Кайнар хәбәр

George Bush: NATO Ğiraqta cirle iminlek köçlären äzerläwdä yardäm itä ala


Ğiraqta totrıqlı xakimiat urnaştıruğa bulışu eşenä Amerika Quşma Ştatları NATO-nı da cälep itärgä telägän ide, xörmätle tıñlawçılar. Läkin 7 industrial'' il häm Rusiä citäkçeläreneñ äle genä See İslandta tämamlanğan oçraşuında bü ölkädä urtaq fikergä kilenmäde. Prezident Bush xäzer inde, NATO illäreneñ Ğiraqqa kübräk ğäskär cibärüe real'' kürenmi, ämma alar Ğiraqnıñ üz iminlek köçlären äzerläwdä yardäm itä ala dip belderä.

Üzeneñ şuşı süzlären George Bush See İslandtağı söyläşülär tämamlanğannan soñ Savannah şähärendä ütkärelgän matbuğat oçraşuında äytte.

Audio, George Bush

"Min NATO illärennän östämä ğäskäri köç täqdim iteler dip uylamıym, bu real'' bulmağan ber närsä. Monı berkem kötmi dä, di amerikan prezidentı, häm bolay dip däwam itä: "bez täqdim itkän närsä şul ğına - NATO Ğiraqnıñ iminlek köçlären äzerläwgä bulışa alır ide, Ğiraq xökümätennän andıy üteneç kiläçäk." Amerikan prezidentı George Bush. Aldınğı 7 il häm Rusiä citäkçeläreneñ şuşı yıllıq oçraşuları ğädättä iqtisadi mäs''älälärne qarawğa bağışlansa da, bıyıl üzäktä Ğiraq häm anda iminlek urnaştıru probleması tordı. Quşma Ştatlardan tış Ğiraqta üz xärbilären şuşı törkem illärennän Britaniä, İtaliä häm Yaponiä genä tota. "Sigezlek"täge qalğan 4 il - Kanada, Fransiä, Germaniä häm Rusiä baştan uq Ğiraq suğışına qarşı bulğan ide. İminlek Şurasınıñ Ğiraq turındağı yaña qararı bu atnada bertawıştan qabul itelsä dä, şuşı dürt il anda üz ğäskärlären cibärü ölkäsendä qaraşın üzgärtmäde. Amerikan diplomatları İminlek Şurası qararı nigezendä Ğiraqtağı xalıqara köçlärne başqa illärneñ öleşe xisabına arttırıp bulır dip kötkän ide, bu uñaydan zur ömetlär näq menä NATOğa bağlandı. Tik Fransiä prezidentı Chirac açıqtan-açıq, yaña köçlär cibärü kiräklegen şik astına quydı, Germaniä kanslerı Gerhard Schroeder isä üzeneñ östämä ğäskärilär cibärügä nigezdä qarşı çıqmayaçağın äytsä dä, üz ileneñ aña qatnaşmayaçağın, yäğni german xärbiläreneñ Ğiraqqa barmayaçağın belderde. Şuşı niätkä qarşı törek premyer-ministrı Räcäp Erdoğan da çıqtı. NATOnıñ Ğiraq eşlärendä ni däräcädä qatnaşa aluı mäs''äläse xäzer şuşı saqlanu berlegeneñ yün azağında İstanbulda uzaçaq yuğarı däräcäle oçraşuında qaralır dip kötelä. Matbuğat oçraşuında Bushtan, başqa illärdän ğäskärlär belän yardäm itü bulmağaç, Ğiraqtağı iminlek öçen bar cawaplılıqnıñ ber Quşma Ştatlarda ğına buluına eçegez pşmıymı dip soradılar. Amerikan citäkçese moña bolay dip cawap birde.

Audio, George Bush

"Ğiraqtağı iminlekneñ üz Ğiraq yöze bulaçaq, alar üz illäreneñ iminlegen üzläre tä''min itäçäk häm bez alarğa bu eştä yardäm itäçäkbez. Bez bügen bu xaqta bik yaxşı ğına fiker alıştıq" di prezident Bush. Küzätüçelär, See İslandtağı söyläşülär amerikan tışqı säyäsäteneñ yänä sığılmalıraq bula başlawın, başqa fikerdä torğan ikençe yaqnı da tıñlarğa tırışuın kürsätte dip isäpli. Moña qädär isä Bush idaräse, xalıqara mäydanda barı tik üz qaraşların ğına alğa sörüe, başqalarnı işetergä telämäwe öçen kisken tänqitlänep kilgän ide. Ğiraq suğışı Washingtonnı yañadan diplomatik tırışlıqlarğa kübräk iğtibar birügä etärä kebek.

Kärim Kamal
XS
SM
MD
LG