Accessibility links

Кайнар хәбәр

Sabantuy rayon köne bula alamı?


Tatarstanda ğına tügel, böten Rusiä, xätta qayber yıraq çit illärdä dä bu könnärdä tatar xalqınıñ iñ bilgele milli bäyräme – Sabantuylar ütä. Sabantuy digändä, qızıqlı milli uyınnar, tatarça cır-biülär, räxätlänep küñel açıp yörüçe xalıq küz aldına kilä. Läkin qayber oçraqlarda barısı da alay al da göl genä bulmıy ikän.

Ğadi keşelärgä bik mäğlüm bulmasa da, Sabantuyğa bäyle problemalar da yuq tügel. Alar bigräk tä Rusiä töbäklärenä xas. Mäsälän, Soçi şähärendä uzğan Sabantuyğa nibarı 200läp keşe kilgän. Şularnıñ distäse – Tatarstannan bäyrämgä kilgän qunaq. Soçidağı millättäşlärebez ällä milli ğöref-ğädätlärne, bäyräm-yolalarıbıznı onıtıp bara, ällä bu olı bäyrämebez xaqında belmi qala. Ä menä Orenburnıñ Äsäkäy rayonında başqa bälä. Soñğı yıllarda anda milli bäyrämne ütkärüne tıymasalar da, anıñ isemen üzgärtergä quşqannar. Şulay itep Äsäkäydä Sabantuyı tügel, ä rayon köne genä ütkärelde. Läkin bıyıl, milli cämäğätçelek sorawı buyınça nihayät bäyrämgä anıñ milli isemen kire qaytarğannar.

Xäyer, Qazannan yıraqta urnaşqan bar Rusiä töbäklärendä dä şundıy xäl dip äytep bulmıy. Mäsälän, 13 yün könne Magnitogorskida uzğan Sabantuy. Anda bäyräm bik matur häm oyışqan räweştä ütkän. Monda bıyıl berençe märtäbä Tatarstannan wäkillär dä qatnaşqan. Qazannan cırçılar Wäis Bäyrämov, Alsu Xisamieva, Färidä-Alsu duetı, Zaman törkeme Magnitogorski xalqı öçen öç säğätlek konsert birgän. Bu turıda bezgä Magnitogorsk Sabantuyında qatnaşıp qaytqan Bötendönya tatar kongressı räise urınbasarı İlsur Hadiullin söyläde. Sabantuyında 15 meñ keşe qatnaşqan. Alar arasında törle millät xalıqları bar, älbättä. Läkin şunısı quanıçlı, Magnitogorskidağı bäyrämne oyıştıruda da, anda qatnaşuda da tatarlar belän başqortlar bergäläşep eş itä. Şulay itep, Sabantuy çittä yäşäwçe ike tuğandaş millätne berläşterüçe çara da bulıp tora.

Gölnaz İlgizär

XS
SM
MD
LG