16 yündä Qazanda respublika uqıtuçılarınıñ cäyge Spartakiadasınıñ finalı tämamlandı. Arğamaq dip isemlängän bu sport yarışlarında respublikanıñ mäğärif oyışmaları xezmätkärläre qatnaşa. Tatarstannıñ Mäğärif ministrı Fariz Xarisov täqdime buyınça oyıştırğan älege bäyge bıyıl inde öçençe märtäbä uzdırıla. Ministr fikerençä, bu bäygelär mäğärif xezmätkärlären häm alar aşa uquçılarnı da, sälämät yäşäw räweşenä cälep itü, alarnıñ fizik äzerlegen yaxşırtu öçen kiräk. Arğamaq yarışları yıl däwamında törle rayonnarda bara. Arğamaq uyınnarında basketbol, ciñel atletika, östäl tennisı, yögerü, milli köräş buyınça yarışlar ütä. Anda respublikanıñ 30 rayonı häm 13 şähärennän komandalar qatnaştı. Bäygeneñ final öleşe Qazanda 14 yünnän 16 sına qädär bardı. Anda 700dän artıq keşe qatnaştı. Ciñüçelär 3 törkemdä bilgelände. Zur şähärlär arasında berençelekne Qazan şähäreneñ İdelbuyı rayonı komandası yawladı. Keçkenä şähärlär törkemendä berençe urınnı Bawlı komandası aldı. Awıl komandaları arasında quqmaralılar ciñü yawladı. Berençelekne yawlağan şuşı öç komandağa mikroavtobuslar büläk itelde. Qalğan prizlı urınnı aluçılarğa da qimmätle prizlar tapşırıldı.
Gölnaz İlgizär
