Accessibility links

Кайнар хәбәр

Sember Sabantuyında 110 çaması Çistay qunağı qatnaştı; ölkä başlığı Vladimir Şamanov jurnalistlar sorawlarına cawaplar birde


Kiläse yal könnärendä bulaçaq Qarsun rayonı Noğay ile häm Urazawıl sabantuyların sanamasañ, Sember ölkäsendä bu milli bäyrämnärebezgä yomğaq yasaldı diärgä dä buladır. Uzğan yal könnärendä Dimitrovgrad (Mäläkäs) häm Sember qalalarında sabantuylar görläde. Mäläkäs sabantuyınıñ elekkelärgä qarağanda bıyıl tiränräk eçtälekle buluın anı oyıştıruçılar bıltırğı Federal Sabantuy täcribäse täesire dip añlattılar. Sember Sabantuyında Çistay rayonınnan 100дә artıq qunaq qatnaştı. Alar arasında räsmi xaqimiät ähelläre, artistlar, maltabarlar, säwdägärlär, köräşçelär bar ide. Rayon xaqimiäte başlığı Vyaçeslav Kozlov kilüneñ maqsatın kürşelär belän iqtisadi, mädäni bağlanışlarnı häm iñ möhime - duslıqnı nığıtu dip añlattı. Çistay qalasınıñ ere şirqat'läre üz tawarlarınıñ kürgäzmäsen oyıştırdılar. Monıñ öçen qunaqlarğa ayırım mäydan bülep birelgän ide. Anda semberlelär Çistay täm-tomnarı häm ataqlı “Sömbel” isemle ansambl birgän konsert belän sıylandılar.

Sabantuy bilgelängän waqıttan soñraq başlandı. Monıñ säbäbe – ölkä xaqimiäte başlığı general Şamanovnıñ yartı säğätkä soñğa qaluı häm, kilgäç tä, jurnalistlar sorawlarına cawap birügä waqıt sarıf itüe. Forsattan faydalanıp, tatar jurnalistları da awırtqan cirläre turında soraw birdelär: “Nihayät, qayçan ölkä üzägendä ayırım tatar mäktäbe, kitapxanäse açılır, bomj xälendä kön kürüçe Tatar mädäni üzägeneñ üz binası bulır?”

Ölkä başlığı mondıy sorawnı qunaqlar aldında birügä beraz qanäğätsezlek belderde, läkin uñayraq cawap birergä tırıştı. Cawap – ğadättägeçä inde: bez bolay da tırışabız, läkin matdi yak qısan, şulay da kiläçäktä bu ixtıäclar ütäler...

Sabantuynı räsmi açu tantanasında Çistay rayonı başlığı Vladimir Şamanovqa, Ul'yan qalası merı Romanenkoğa, cirle avtonomiä räise Kurçakovqa zatlı töbätäy häm çapannar büläk itte. Azat Kurçakov üz çığışında ölkäneñ Tatarstan belän iqtisadi bağlanışları nığıw turında misallar kiterde. Şamanovnıñ süze ğibrätle yañğıradı: “Soñğı waqıtta Ul'yan ölkäsen Tatarstanğa quşu (prisoedinenie) turında süzlär yöri. Duslar aldında äytäm: mı nikogda ne otsoedinyalis' ot Tatarstana”. Milli köräştä ciñüçelärneñ Tatarstan wäkilläre buluı da mäğnäle. Absolyut batır - Nurlattan kilgän köräşçe Abbasov İldar, ikençe urında - bualı Ramil Camaletdinow, öçençe – Dimitroğradta yäşäwçe Sergey Pawlik. Qızğanıç, töp qunaqlar wäkile – Çistay rayonınıñ absolyut batırı Rawil Nurullin iñ köçle köräşçelär arasında dürtençe urınğa ğına layıq buldı.

Ayrat İbrahim, Sember
XS
SM
MD
LG