Accessibility links

Кайнар хәбәр

Yekaterinbur Sabantuyında Alabuğa qaunaqları qatnaştı


Yekaterinburg şähärendä yıl sayın uzdırıla torğan sabantuylar biredä yäşäwçe tatar häm başqortlarnıñ ğına tügel, bar xalıqnıñ da iñ yaratqan bäyrämnäreneñ bersenä äwerelde. Bu yılğı bäyrämne açıp cibärgän çağında, şähär başlığı Arqadi Çernetskiy, Yekaterinburgta 100 meñgä yaqın tatar häm başqort xalqı yäşäwen iskärtep, şähär xakimiäteneñ milli mädäniätne üsterügä zur ähämiät birüen äytep ütte. Anıñ äytüençä, här millät üz yözen saqlap qalırğa tieş. Şul waqıtta ğına yözdän artıq millät yäşägän cirdä sotsial' tigezlek, tınıçlıq häm duslıq bulaçaq. Şähärneñ üzäk parkında uzdırılğan bäyrämgä böten ölkädän bik küp xalıq cıyıldı. Bu yılğı sabantuynıñ iñ qäderle qunaqları bulıp Tatarstan Respublikasınıñ Alabuğa şähärennän ber törkem qärdäşlärebez kilgän ide.

Alabuğa şähäre başlığınıñ berençe urınbasarı Mödärris ulı Färit Xänifov citäklägän delegatsiä Ural cirenä maxsus samolet belän kilde. Qunaqlar buş qul belän kilmägännär. Sabantuy küçtänäçe itep bik zur konsert, yarışlarda ciñüçelärgä büläklär, Tatarstan cirennän qoyaşlı säläm alıp kilgännär. Färit Xänifovnıñ Tatarstan prezidentı Mintimer Şäymiev isemennän cibärelgän qotlaw telegrammasın uquın xalıq därräw qul çabıp qarşı aldı.

Açılu tantanası waqıtında qunaqlar Yekaterinburg şähäre citäkçelärenä matur itep çigelgän çapan, tübätäy, çäk-çäk büläk ittelär. Annan soñ maxsus kiterep qorılğan çatır eçendä tutırma, qaqlağan qaz, öçpoçmaq kebek tatar milli rizıqları belän bay tabın yanında xucalarnıñ üzlären qabul ittelär. Tabın yanında üzara xezmättäşlek itü, nıqlı duslıq cepläre buldıru turında süz alıp barıldı. Delegatsiä citäkçese Färit Xänifov Rusiädä öçençe başqala bulıp sanaluçı Yekaterinburgnıñ bik quätle şähär ikänlegen üz küzläre belän kürep soqlanuın belderde.

Bilgele inde, qısqa ğına waqıt eçendä şähär tormışınıñ bar yaqları belän dä tanışıp betü mömkin tügel. Şunıñ öçen xucalar qunaqlarnı 14нче avgustta bulaçaq şähär könenä tağın kilergä çaqırdılar. Alabuğalılar üz çiratında urallılarnı Respublika könenä kötep qaluların belderdelär.

Mul bizäkle sabantuy bik küñelle bardı. Parknıñ estrada teatrı säxnäsendä Alabuğa sänğät ostaları bik matur konsert quydılar. Alabuğa cäwhärläre çığışın xalıq bik yaratıp qabul itte.

Estrada teatrı säxnäse irtädän kiçkä qädär buş tormadı. Yekaterinburg şähäre sabantuyına maxsus kilgän Färidä häm Robert Timerbayıvlar da üzläreneñ matur çığışları belän xalıqnı quandırdılar. Annan soñ cirle talantlar çığışı buldı. Yekaterinburg sabantuyı barlıq uyınnar tämamlanğaç ta tatar yäşläre diskotekası belän töngä qädär däwam itte.

Fäwiä Safiullina, Yekaterinburg
XS
SM
MD
LG