Comğa könne Başqortstan Üzäk saylaw komissiäseneñ yaña sostawınıñ täwge utırışı bulıp ütte. Anıñ eşendä Mäskäwdän kilgän Rusiä Üzäk saylaw qomissiäse äğzası Yevgeniy Kolyuşin da qatnaştı. Ä Başqortstan yağınnan respublika prezidentı xakimiäte başlığı Radiy Xäbirov häm Däwlät cıyılışı räise urınbasarı Salawat Qusimov kilgän ide.
Täwge utırışnıñ kön tärtibe fäqät oyıştıru mäsälälärennän genä tordı. Üzäk saylaw komissiäse äğzaları üzläreneñ räisen, anıñ urınbasarın häm komissiäneñ särkätiben sayladı. Yäşeren tawış birü näticäsendä Başqortstan Üzäk saylaw komissiäse räise itep yañadan Barıy Kincäğulov saylandı. Ul bu wazıyfanı 1998 yıldan birle başqara inde. Räis urınbasarı itep älege waqıtta Başqortstan tışqı iqtisadıy bäyläneşlär häm säwdä ministrı urınbasarı bulıp eşlägän Fänis Ämerov saylandı. Ä särkätip urınında yañadan moñarçı da şuşı wazıyfanı başqarğan Nailä Altınowa qaldırıldı.
Şulay itep Başqortstan Üzäk saylaw komissiäseneñ elekke sostawınıñ wäqälätläre bügennän ğämäldän çıqtı häm yaña wäkillärneñ wäqälätläre üz köçenä kerde. Saylaw komissiäsendä cämğıse 12 keşe eşläyäçäk.
Bügenge köngä qädär Üzäk saylaw komissiäseneñ räise urınına bälki Barıy Kincäğulovnı yañadan saylamaslar da äle digän farazlar bar ide. Çönki Rusiä Üzäk saylaw komissiäse räise Aleksandr Veşnyäqov küptän tügel ber äñgämäsendä bu kandidaturanı yaqlamawın beldergän ide. Monı ul Kincäğulov äfände citäklägän saylaw komissiäseneñ uzğan yıl Başqortstan prezidentın saylawlar çorında qanun bozuları belän bäyläp añlattı. Ämma şul äñgämädän soñ ike – öç kön ütkäç, qayber matbuğat basmalarında «Başqortstan Üzäk saylaw qomissiäse räisen saylawnı Veşnyäqov Başqortstan xaqimiätläre ixtıyarına quyğan», digänräk xäbärlär bulıp aldı. Ä inde Başqortstan citäkçeläre üzlärenä tuğrı xezmät itkän keşeneñ yañadan da saylaw komissiäse räise itep saylanuına quşqullap rizalıq birgän bulıp çıqtı. Işanıçnı aqlağan keşe belän eşläwe räxäträk iç inde ul. Tik menä Veşnyäqov äfändeneñ üz fikeren berniçä kön eçendä üzgärtep quyuı ğına küp sorawlar tudırdı.
