Här yuğarı uqu yortınıñ qabul itü komissiäläre işekläre yanında student bulırğa telägän yäş yeget-qızlardan su buyı çirat tüzelep kitkän. Tirä-yündä äle qaysı institut yäki universitet, akademiädä tuqtalırğa belmägännär taqtada elengän beleşmälär belän tanışa, inde dokumentlarnı tapşırğannar belän aralaşa, uqu, uqıtuçılar, imtixannar turında mäğlümätlär cıya. Ä qabul itü komissiä wäkilläre bu arada irtädän kiçkä qädär abiturientlarnıñ dokumentların qabul itä. Bıyıl yuğarı uqu yortlarına kerü niçek bara soñ? Qabul itü komissiäläreneñ äle çağıştırmaça küptän tügel genä eşli başlawı säbäple ber urınğa niçä keşe uqırğa kerergä telägänen küp kenä uqu yortlarında äytergä qıyınsındılar. Barı tik abiturientlarnıñ sanı uzğan yılnıñ şuşı waqıtı belän çağıştırğanda beraz kübräk, dip kenä äyttelär. Dokumentlarnı bıyıl 15 yülgä qädär qabul itäçäklär äle.
Qazan Däwlät texnologiä universitetında da xalıq bik küp, qabul itä komissiälärendä distälärçä keşe bulsa da, alarnıñ berse dä eşsez utırmıy. Qazan däwlät texnologiä universitetında här telägän keşe kerü imtixannarın tatar telendä tapşıra ala. Monıñ öçen maxsus ğariza yazıp qına birergä kiräk. Şulay uq inde 3-4 yıl universitetnıñ 3 fakul’tetında tatar gruppaları da oyıştırılğan. Ağaçnı eşkärtü, Ximik texnologiälär, İqtisat häm şirkätlärdä idärä belgeçleklären tatar telendä alıp bula. Annan tış, tatar telendä belemne Qazan däwlät pedagogiä universitetında, tözeleş akademiäseneñ ber fakul’tetında, Qazan sänğät häm awıl xucalığı akademiäläreneñ berniçä bülegendä alıp bula. Añlaşıla inde, monda kergändä imtixannarnı tatarça tapşırıp bula.
Annan tış, pedagogiä universitetında häm tözeleş akademiäsendä telägän oçraqta bar kerü imtixannarın tatar telendä birep bula. Ä menä Qazan däwlät universitetında andıy mömkinçelek yuq, dip belderdelär. Xäyer, yuğarı uqu yortlarına kerü imtixannarı turında tulıraq itep bez sezgä äle kiläçäk tapşırularıbızda söylärbez.
Gölnaz İlgizär
