Comğa könge gazetalar Tatarstan Däwlät Şurasınıñ yazğı sessiäseneñ qayber qararların çığardılar. Berençe urında İsäp-xisap palatasına citäkçelek bilgelänügä qağılışlı dokumentlar. İsäp-xisap palatası räise Aleksey Demidovnıñ tärcemäi xäle turında mäğlümätlär kiterelä. Anıñ urınbasarı itep Finans ministrlığı Kaznaçeystvo departamentı direktorı urınbasarı bulıp eşlägän Säriä Wälieva bilgelänüe turında häm auditorlar itep bilgelängän Damir Şamgunov, İl'nur Möbäräkov, Sergey Kolodnikovlar turında qayber mäğlümätlär. Qayber mäğlümat çaraları İsäp-xisap palatasınıñ citäkçelege raslanıp anıñ eşkä kereşüen häm prezident qarşındağı Kontrol'- revizion idaräneñ beterelüen iğlan itelüen sessiä utırışınıñ töp sensatsiäse dip atıylar. Berençedän bäysez däwlät kontrole oyışması buldırıldı. İkençedän qayber analitiklar şundıy wälälätlär birelgän oyışma jitäkçelegenä kem quyıluınan ä elekkege kontrol' oyışmalarınnan kemnär kitüennän törle farazlar yasap qarıylar. İsäp-xisap palatasınıñ räise itep 50 yäşlek Aleksey Demidov quyılu- bu prezident xer-fatixasınnan eşlängän ğamäl. Nindi kriteriylardan çığıp saylandı soñ Aleksey Demidov? Prezident anıñ namuslılığın berençe itep atadı. Ä deputat Robert Miñnullin üzeneñ çığışında şağirlärçä şartlatıp-“ ul rvaç tügel, xapuğa tügel”, yäğni Aleksey Demidov qomsız tügel, rişwät aluçı tügel dip äytep birde. Mäğlümät çaralarında sessiä utırışı başında deputatlar Sergey Titov, Robert Sadıykov, Aleksandr Ştanin kütärgän mäsälägädä iğtibar itälär. İnde söylägänebezçä bu deputatlar sotsial' taşlamalarnı aqçalata kompensatsiälärgä alıştıruğa qarata Rusiä xäkimiätenä möräcäğät belän çığarğa täqdim ittelär. Däwlät Şurası citäkçelege Rusiä Däwlät Duması bu mäs’äläne qararğa kereşkänçe möräcäğät belän çığu irtäräk digän fikerdä. Deputat Robert Sadıykovnıñ Azatlıq radiosı tıñlawçıları öçen birgän interv'yusında äytüençä...möräcäğät äzer häm ul Rusiä Dumasına ireştereläçäk. Eçtälegenä kilgändä anda deputat Sergey Titov täqdim itkän variant östenlek itä. Yäğni Rusiä parlamentı tikşerergä kereşkän sotsial' paketta qaralğan veterannarğa sotsial' yärdäm töbäklärgä yöklänä. Töbäklärneñ törlese bar. Şuña kürä törle töbäktä yäşäwçe veterannar törle şarlarğa quyıla monıñ belän Tatarstan Däwlät Şurası deputatları kileşä almıy. Läkin Däwlät Şurasınıñ kommunistlar fraksiäse sotsial' paketta qaralğan taşlamalarnı aqçalata tüläwlärgä äyländerüneñ tağıda zıyanlıraq yaqları bar dip sanıy... Bu äyläneşkä kerteläçäk östämä aqçalar inflyatsiäne arttıraçaq. Taşlamalar adreslı sotsial' yaqlawnıñ iñ kamil' räweşe ide. Aqçalata tüläw sotsial' yärdämne adressız itäçäk dip sanıy kommunistlar fraksiäse. Läkin möräcäğät tekstın kileştergändä kommunist deputatlar üz dälillären kertüne qatğıy talap itep quymağannar.Yunıs Ätnäle.
