Nursoltan Nazarbaev Başqortstanğa eş säfären tämamladı

Qazaqstan prezidentı Nursoltan Nazarbaev comğa könne Başqortstanğa eş säfären tämamlap, irtänge säğätlärdä ük üzeneñ maxsus oçqıçında Mäskäwgä kitte. Nursoltan Nazarbaev citäkçelegendäge wäkillek Ufağa Tatarstanğa yasağan eş säfärennän soñ, 1 iyül könne töş waqıtında kilgän ide. Ufağa kilgäç Qazaqstan prezidentı Başqortstan citäkçese Mortaza Räximov belän oçraşıp söyläşülär ütkärde. Şul uq waqıtta Qazaqstannıñ eşlekle dairäläre üzläreneñ Başqortstandağı xezmättäşläre belän ayırım söyläşülär oyıştırdı. Waqıt qısan bulğanlıqtan, Nursoltan Nazarbaev Ufada älläni küp urında bulalmadı. Xätta jurnalistlar belän dä ayırım oçraşuğa forsat tabılmadı. Räximov äfände belän söyläşülärdän soñ, ul Salawat Yulayıv häykälenä çäçkälär saldı. Annan soñ, Başqortstan citäkçeläre ozatuında, başqaladağı Qunaqsaray säwdä – yal itü üzägenä kerep çıqtı. Ä soñğı eşlekle säfär küz häm plastik xirurgiä buyınça Bötenrusiä «Alloplant» üzägenä ide. Biredäge zamança däwalaw mömkinleklären Nursoltan Nazarbaev yuğarı bäyäläde häm Qazaqstanda da şuşı üzäkneñ filialın açu telägen äytte. Şuşında anı Qazaqstannan täcribä urtaqlaşu öçen praqtiqağa kilgän ber tabibä tutaş belän dä tanıştırdılar. Qazaqstanğa qaytqaç, ul da şuşındıy üzäkneñ bülegen açu öçen möräcägät itärgä cıyınıp yörüen citkerde. Şulay itep eş säfäre barışında qayber faydalı ğına täqdimnär aldağı niätlär däftärenä terkälä bardı. «Alloplant» üzägennän çıqqaç, jurnalistlar Qazaqstan prezidentı belän aralaşudan bötenläy mäxrüm qalmasın dipter inde, uramda, açıq hawada tiz genä matbuğat oçraşuı da oyıştırıp aldılar. Ufadağı oçraşular häm söyläşülär barışında Qazaqstan yağı Başqortstanğa baytaq qına üzara faydalı täqdimnär äytte. Älege waqıtta Başqortstan belän Qazaqstan arasındağı yıllıq üzara säwdä äyläneşe küläme nibarı 230- 240 million sum ğına täşkil itä. Bu ike quätle töbäk öçen bik az, älbättä. Oçraşu barışında bıyıl köz, atap äytkändä, üktäber ayında Qazaqstanğa Başqortstan prezidentı citäkçelegendäge wäkillekneñ cawap säfären oyıştırırğa kileştelär. Ul säfär barışında Astanada Başqortstannıñ Qazaqstandağı daimi wäkilçelegen açu tantanası da bula.

Comğa irtän Nursoltan Nazarbaev Mäskäwgä oçtı. Şuşı uq könne Mortaza Räximov ta Mäskäwgä kitte. Anda ul Rusiä Däwlät Sowetı utırışında qatnaştı.