Accessibility links

Кайнар хәбәр

Başqortstan oçuçıları eş taşlawların waqıtlıça ğına tuqtattı


«Başqortstan hawa yulları» şirkäte citäkçelege belän biredäge oçuçılar kollektífı hönär berlekläre arasında yartı yıl çaması elek başlanğan tartqalaş haman da xäl itelmäde. İnde xäbär itelüençä, oçuçılar hönär berlekläre 2004 yıl öçen üzläre äzerlägän kollektíf xezmät Kileşüen «Başqortstan hawa yulları» avíakompanísı citäkçelege qabul itmägäç, ike arada mönäsäbätlär şaqtí kiskenläşkän ide. Oçuçılar üzläreneñ xezmät xaqınıñ az buluın, sosíal yaqlanğanlıqnıñ tieşle däräcädä bulmawın kürsätep, xezmät şartların yaxşırtu häm aylıq eş xaqın kütärüne taläp itte. Ämma bu taläplärne citäkçelek şunda uq kire qaqtı. Şul xäldän soñ oçuçılar üzläreneñ täqdimnäre qabul itelmägän oçraqta eş taşlayaçaqların beldergän ide. Andí belderüdän soñ Başqortstan Hawa yulları şirkäte türäläre biredäge hönär berlekläre belän yañadan söyläşülär başlarğa mäcbür buldı. Ämma oçuçılarnıñ hönär berlege wäkilläre belän soñğı könnärdä barğan söyläşülär bu yulı da uñay näticä birmägän, çönki avíakompaní citäkçeläre taşlamalarğa barudan tağın baş tartqan. Moñarçı eş taşlawlardan tíılıp kilgän oçuçılar kollektífınıñ bu yulı sabırlığı bette häm alar 8 yül könne eş taşlawları xaqında iğlan itte. Şulay itep atnaqiç könne Ufa aeroportında kierenke xällär başlandı. İstanbulğa, Mäskäwgä, Sankt – Peterburgqa häm qayber başqa şähärlärgä oçarğa tieşle oçqıçlar hawağa kütärelmäde, hawa alanında torıp qaldı. Şunıñ arqasında yözlärçä keşe aeroport binasında, cäyge çellädä cäfa çigärgä mäcbür buldı. Comğa könne BAL hawa yulları şirkäte general direktorı Wener Şaqírov belän kileşkännän soñ, oçuçılar kollektífı eş taşlawların waqıtlıça tuqtatıp torırğa buldı. Töş aldınnan oçuçılarnıñ hönär berlege citäkçeläre Wener Şaqírovta yañadan söyläşülär başlağan. Başqortstan hawa yulları şirkäte citäkçelege oçuçılar kollektífınıñ taläplären qabul itärme? Comğa könge täwge söyläşülär aldağı köngä ömet uyatamı? Şuşı sorawlarğa cawap alu öçen, bez «Başqortstan hawa yulları» şirkäteneñ oçuçılar hönär berlege räise Sergey Yıştoqinğa möräcäğät ittek.

(yazma)

Sergey Yıştoqin süzlärençä, «Başqortstan hawa yulları» şirkäte oçuçılar sostawı administrasí aldına xäl itelmästäy taläplär quymí. Barı tik alarnı çişü öçen ixtíar häm teläk kenä kiräk. Ä älegä Sergey Yıştoqin atnaqiç könne barası cirlärenä kitä almíça Ufa aeroportında utırırğa mäcbür bulğan xalıqtan barlıq oçuçılar kollektífı isemennän ğafu ütenüen citkerä. «Şul uq waqıtta passajirlar da bezneñ xälne añlasınnar ide, – di Yıştoqin äfände. – Az xezmät xaqı alğan, törle sosíal östenleklärdän mäxrüm itelgän oçuçılar niçek itep imin oçularnı täemin itä alsın inde. Ğailäsen niçek tuydıru turında gel genä uylap yörgän oçuçıdan taläp itüe dä qíın.

Soñğı yıllarda «Başqortstan hawa yulları» şirkäte eşçänlege körçekkä terälü däräcäsenä citte. Biredä citäkçelärneñ törle qırın ğämälläre açıqlanıp, küp şaw – şular bulğannan soñ, şirkät 2002 yılda Rusiä federal milkenä küçerelgän ide. Xäzer anı xosusílaştırırğa cíınalar. Soñğı ike yılda «Başqortstan hawa yulları» şirkätendä oçuçılar sanı 50 prosentqa qısqartıldı. Oçqıçlar sanı da nıq kimede. Xäzer biredä TU – 154 häm TU – 134 marqalı nibarı 12 oçqıç isäplänä. Aları da iskerep betkän inde.
XS
SM
MD
LG