Accessibility links

Кайнар хәбәр

Udmurtiä respublikasınıñ Votkinsk şähärendäge mäçeteneñ 210 yıllığına zur qunaqlar kilde


Ütkän yäkşämbedä Udmurtiä möselmannarı olı qunaqlar qabul itte. Respublikağa Ufadan Mäftiy Tälğät Tacetdin, Mäskäwdän İslam universitetınnan Marat xäzrät Mostafin, Tübän Novgorodtan häm başqa şähärlärdän däräcäle qunaqlar kilde. Alar Udmurtiä Respublikasınıñ Votkinsk qalasındağı mäçetkä 210 yıl tuluı uñayınnan bulıp uzğan tantanada qatnaştı. Älege waqiğa Udmurtiä möselmannarı öçen genä tügel, bu töbäktäge barlıq din totuçılar öçen dä zur tantana, dip belderdelär cıyılışta qatnaşqan barlıq din äxelläre häm möselmannar. Mäftiy Tälğät Täcetdinneñ Boxarada uqığanda Votkinsk mäçetendä praktika uzğanı da mäğlum buldı. Mäçet bügenge başqa binalardan arxitektura üzençälege belän ayırılıp tormıy, şulay buluğa da qaramastan, ğibädät binası şähär tarixı belän nıq bäyle, dip belderde respublika xakimiätennän dinnär eşe buyınça belgeç Sergey İl'inskiy. Ural - İdel töbägeneñ cir astı baylıqların ezläp, alarnı eşkärtü çorında Votkinsk zavodı tözeleşenä tatarlar da kiterelä. Arxiv materiallarına qarağanda 24 xatın - qız, 26 ir - at qına bulsalar da, alarğa mäçet tözergä röxsät birelä. Ğasırdan artıq eşläp kilgän mäçetne 20 - 30 yıllarda kommunistlar sütep taşlarğa qarar qıla. Şähärdä yäşäwçelär anı saqlap qala. Kiläçäk buın öçen mäçetne saqlap qalu maqsatı belän berniçä yıl elek iske binanı taş belän äyländerep alıp, anıñ yanına mädräsä dä tözedelär. Yañartılğan iman yortına bügen yäşlär dä yöri, şularnıñ berse - Qasıym Karavaev. Qasıym qatnaş ğailädä üsä, anı äbise mäçetkä alıp kilgän. Yeget mäçetkä inde sigez yıl yöri, üzenä kiläçäktä cämğiättä yaraqlı hönär saylasa da, äle ul mäktäp uquçısı, ämmä islam qanunnarın tulısınça ütärgä niätli. Votkinsk şähäre mäçeteneñ yubileen uzdıruda Udmurtiä mäftiäte, «İxlas» xäyriä fondı, Tatar ictimaği üzäge zur köç quydı. Votkinsk mäçete imam xatıybı Möxämmätnur xäzrät Aşrapov bäyrämnän qänäğät.

Xamidä Ğayfullina, Udmurtiä
XS
SM
MD
LG