«Tatnet» tapşıruın bu çığarılışın global çeltärdä häm real tormışta bulğan ber xäl belän tanıştırudan başlap cibäräse kilä. İnternet mawıqtırğıç, ğäcäyep dönya bulıp qına tügel, qurqınıç, problemalar tudıra torğan ber möhitkä dä äylänä torğan sıyfatqa iä. Eçke eçlär ministrlığınıñ yağarı texnologiälär ölkäsendä qılına torğan cinayätlärne tikşerä torğan «K bülege» belgeçläre bezgä ber qıssa söylädelär. Şuşı könnärdä Qazanda yäşäwçe ber ir-at qulğa alınğan ikän.Nikolay dip atıyq anı. Ul üzeneñ xatınına üç alırğa uylağan häm bu maqsatqa internet yärdämendä ireşkän. İr belän xatın arası küptän suınğan bula. Par ayırılışa häm bala mäs’äläsendä süzgä kilep, tämam açulanışıp betä. İr keşe xatınnan üç alırğa bula. Ul üze eşlägän urındağı kompyuter aşa internetqa çığa häm törle tanışular säxifälärendä, seks täqdim itüçe saytlarğa xatınnıñ räsemen, isemen, barlıq telefonnarın,öy adresın urnaştıra. Xatınnı Svetlana dip atıyq. Nikolay anıñ isemennän elektron poçta tartmasın açıp, seks ezläwçe ir-atlarğs xatını isemennän xatlar yazışıp yatqan. Xatın-qız da, irlärneñ bäylänülärenä qarşı torıp, şaqtıy cäfa çikkän. Bu xäl mart ayınnan birle, iyülgä qädär däwam itkän. Soñınnan, Svetlana militsiä xezmätkärlärenä, telefonnan könenä 20-30 tapqır oyatsız täqdim işetüen söyli. Ul bu eşneñ artında ire torğan çamalağan, tüzgän, militsiägä möräcäğät itmägän. Axırdan, Svetlananıñ eşlägän urınında irlärneñ ni säbäple küpläp şaltıratuın belälär dä, anıñ ğäyepsezlegenä ışanmıyça, eşennän kitärgä täqdim itälär. Şunnan soñ ğına Svetlana, Eçke eçlär ministrlısınıñ «K bülege»nä möräcäğät itä, häm şuşı bülek tikşerüçelär genä Svetlananı xezmättäşläre aldında aqlıy ala, aña eşen saqlap qalırğa yärdäm itä.
Nikolaynıñ da ezenä çığalar. Ul eşlägän şirkättä, eş cihazların nindi maqsatta qullanğanın belälär häm eşennän quyalar. «K bülege» tikşerüçeläre Nikolaynı cawaplılıqqa tarta. Ul Cinayät Kodeksnıñ 129 matdäse nigezendä, yala yağuda ğäyeplänä. Aña 1 yıldan başlap 2 yılğa qädär tözätü eşläre häm zur ştraf tüläw kebek caza birelergä mömkin. Läkin älegä bu xaqtağı mäqkämä utırışı bulmağan, qarar çığarılmağan.
«K bülege» xezmätkärläre beldergänçä, Svetlana urınında härkem bula ala. Monda yaman niättän saqlanıp bulmıy. İnternet, doşmanlıq qıluçılarğa küp mömkinlek birä, surätne ğömerdä bulmağan cirgä, başqa keşe gäwdäsenä yabıştırıp bula, şäxeskä qağılışlı mäğlümatlarnı urnaştırırğa, häm işetkänegezçä, keşe isemennän xatlar yazıp bula. Professional däräcädä eşlänsä, doşmanlıq teläüçe keşeneñ çeltärdäge ezlären dä tabu şaqtıy awırlaşa. Monda belgeçlärneñ yärdäme häm üzeñneñ uyaw bulu ğına yärdäm itä ala.
Bikä Timerova.
