Soñğı arada respublikada pravoslav dinen totuçılar öçen ber ähämiätle yañalıq – başqalağa Vatikannan Qazan izge anası ikonasın qaytaru turında küp yazıla häm söylänä. Läkin küplärdä älege ikonanı qaytaru tiräsendäge şaw-şu rizasızlıq ta tudıra. Menä Tatar ictimaği üzäge räise Räşit Yağfarov imzalağan möräcäğättä dä süz näq şuşı xaqta bara. 22 yül könne uzğan ictimaği üzäkneñ Prezidium utırışında qabul itelgän bu möräcäğättä älege ikona tatar, möselman xalıqlarınıñ kolonial’ qollıq simvolı bulıp tora, dip äytelä. Qazan xanlığın basıp alğannan soñ, anıñ cirlärennän tatarlarnı quıp cibärer öçen yış qına xristiannarnıñ dini simvolların qullanğannar. Mäsälän, berär tatar awılı yanında cirgä tönlä täre yäki ikona qazıp salınğan. İrtä belän bar xalıq aldında älege yalğan tabıldıqnı qazıp alıp, alar nigezendä bu cirlär xristiannar cirläre, dip iğlan itelgän. Qazan izge ana ikonası da şular rätennän, dip yazıla Tatar ictimaği üzägeneñ belderüendä. Şuña da, tatar xalqınıñ tarixi xäteren kimsetä torğan ikona temasına şaw-şunı tuqtatıp, waqıt häm aqçalarnı Qazannıñ başqa küpsanlı problemalarına yünältergä kiräk, pravoslav çirkäw üz mäs’älälären tatar çinovniklarısız da çişä ala, digän fikerlär yazılğan Tatar ictimaği üzägeneñ 22 yül könne qabul itelgän belderüendä.
Gölnaz İlgizär
