Accessibility links

Кайнар хәбәр

Udmurtiä rayonnarında mäçetlär sanı arta


Bügengä Udmurtiä respublikasında 23 ğibädät yortı eşli. Alar arasında Votkinsk şähärendäge mäçet şuşı könnärdä üzeneñ 210 yıllıq yubileen bilgeläp ütte. Bu xaqta «Azatlıq» radiosın daimi tıñlawçılar işetep belälär. Şulay uq respublikada ğasırğa yaqın tarixı bulğan tağın ike mäçet bar. Alar Balezino rayonınıñ Kistem häm Padyura awıllarında urnaşqan. İman yortların ütkän ğasırnıñ 20 – 30nçı yıllarında din qärdäşlärebez saqlap qala alğan, anda bügen dä ğibädät qılalar. Şul uq waqıtta soñğı yıllarda tatarlar kümäk yäşägän töbäklärdä yaña mäçet binaları kütärelep tora. Yukamen rayonında yäşäwçe millättäşlärebez, qızğanıçqa qarşı, kommunistlar çorında mäçetlären iman yortı bularaq saqlap qala almağan. Qaysıber awıllarda alarnı sutep alğannar, ikençelärendä mäçet manaraların kisep töşerep, alarnı äle bügen dä klub bularaq qullanalar. Poçinki awılında xäzer möselmannarı tırışlığı belän yaña mäçet torğızalar. Anda inde eşlär tögällänep kilä, dip söyläde imam wazifasın başqaruçı Nädir Buzanakov. Poçinki awılı mäçete imamı Nädir Buzanakov bügenge yäşlär arasında barısıda da diärlek ul citäklägän tügäräklärgä yörep, din nigezlären öyrängän, tik kübese şäriğät qanunnarın ütärgä aşıqmıy. Monda inde imam ata—analarnı ğayepli. Poçinki belän kürşe bulğan Tegermän awılında da mäçet salalar. Dimäk, möselmannar üzläre mäçet salırğa yärdäm itmi, ä mäçetkä yörüçelär bulırmı soñ, ul awıl urtasında yätim bulıp tormasmı? Äñgämälärne Azatlıqnıñ sişämbe tapşıruında tıñlağız.

Xämidä Ğayfullina, İjaw
XS
SM
MD
LG