30 iyül könne Ufada Başqortstan tatar milli oyışmaları citäkçeläre häm aqtiv äğzalarınıñ çirattağı utırışı bulıp ütte. Anı, ğädättägeçä, Tatarstannıñ Başqortstandağı Säwdä – iqtisadıy wäkilçelege citäkçese, Başqortstan Tatar kongressı Başqarma qomitetı räise urınbasarı Ramil Bignov açtı häm alıp bardı. Älege utırışnıñ kön tärtibenä, aldan uq iğlan itelüençä, Tatarstanda Başqortstan tatarları könnären ütkärü mäsäläse kertelgän ide.
Elekke proğrammalarıbızda da äytelüençä, şuşı könnärne ütkärüne oyıştıru komitetı äğzalarınnan torğan ber törkem Qazanğa eş säfäre belän barıp qaytqan ide. Älege törkem wäkilläre Tatarstanda respublikanıñ baytaq qına räsmi türäläre häm Bötendönya Tatar kongressı Başqarma komitetı citäkçeläre belän oçraşıp Tatarstanda Başqortstan tatarları könnären ütkärüneñ täğayın waqıtın bilgelärgä häm bu möhim çaranıñ proğrammasın bergäläp tözergä tieş ide. Älege oçraşular çınlap ta buldı. Ämma Qazandağı söyläşülär bu bäyrämne ütkärügä äzerlek mäsäläsendä küp sorawlar qaldırdı. Xätta Başqortstan tatar milli oyışmaları arasında Tatarstanda Başqortstan tatarları könnären bötenläy dä ütkärmäskä mömkinnär ikän, digän imeş – mimeşlär dä taralıp ölgerde.
Bügenge oçraşuda qatnaşqan millättäşlär Qazanda yörep qaytqan wäkillärdän şuşı mäsälägä qağılışlı anıq fikerlär işetü ömete belän kilgän ide.
Qazanğa barğan törkemnän Ramil Bignov, professor Ruşan Ğallämov, Mäcit Xucin, Kärim Yawşevlarnıñ çığışları iğtibarğa layıq. Alarnıñ çığışlarınnan şul añlaşıldı – Qazanda Başqortstan tatarları könnären ütkärügä, ğomumän alğanda, uñay qarıylar. Ämma şul uq waqıtta qapma – qarşılıqlı fikerlär äytüçelär dä bar ikän. Şulay da Tatarstan prezidentı kiñäşçese Rafael Xäkimov, Bötendönya Tatar kongressı Başqarma komitetı räise Rinat Zaqirov, TR Däwlät Sovetı deputatı Räzil Wälievlar belän söyläşülär näticäle bulğan.
Kiñäşmädä çığış yasawçılar Qazanda Başqortstan tatarları könnären üktäber ayı başınnan da qalmıyça ütkärergä kiräk, digän urtaq fikeren belderde.
Başqortstan Tatar kongressı Başqarma komitetı äğzası, professor Ruşan Ğallämov Başqortstanda yäşäwçe tatarlarnıñ problemnarın yaqlaw öçen xalıqara oyışmalarğa qädär barıp citärgä kiräk dip kisterep äytte.
Ruşan Ğallämov Başqortstanda tatar telenä däwlät tele –statusı birü yünäleşendä dä xästärleklärne tuqtatmasqa çaqırdı. «Bıltır Başqortstanda prezident saylawları çorında Rusiä prezidentı xaqimiäte wäkile Surkov äfände belän İdel buyı federäl oqruğındağı tulı xoquqlı wäkil Kirienqo äfände Başqortstanda tatar tele statusın kütärü kiräklegen äytkän ide, – dide Ruşan äfände. – Xäzer şul wäğdälären alarğa iskä töşerep, räsmi xatlar yazarğa kiräk». Utarışta ağımdağı başqa mäsälälär dä qaraldı.
