Tatarstanda urıp-cıyu eşläre könnän kön qıza bara. Awıl xucalığı ministrlığı börteklelär çäçelgän mäydannarnıñ 16% cıyıp alındı dip xäbär itä. İnde 400 meñ tonnağa yaqın ikmäk cıyıp suqtırılğan. Premyer-ministr Röstäm Miñnexanov atna başında respublikanıñ kön''yak rayonnarında urıp-cıyu eşläre barışı belän tanışıp yörgäç, eşlär şulay barsa häm hawa şartları tağın berär atna şulay uñay torsa, Tatarstan uzğan yıllardağı kebek zur uñış cıyıp alaçaq digän näticä yasağan ide. Mäğlüm ki, respublika awıl xucalığında inde 3 yıl rättän 5 million çaması rekordlı uñış cıyıp alındı. Läkin urıp cıyunıñ iñ qızğan çaqlarında häm tağın rekordlı uñışlar farazlanğan könnärdä ikmäk bäyäläre kütärelep quyıla. Pänceşämbe könne şähär urtasındağı supermarketta ğädättägeçä ğailäbez yaratqan kümäç alğanda bäyäse 1.50 sumğa artqanın äyttelär. Atna başınnan ikmäk bäyäläre 20% çaması artqan ikän.
Awıl xucalığı ministrlığınıñ citäkçelegendä dä üzgäreşlär bar. Monnan ber atna çaması elek Awıl xucalığı ministrınıñ igençelek buyınça urınbasarı Tahir Hadiev başqa eşkä - Tatarstan awıl xucalığı fänni ezlänülär institutı direktorı itep küçerelüe säbäple wazifasınnan azat itelgän ide. Pänceşämbe könne bu wazifağa, yäğni Awıl xucalığı ministrı urınbasarı itep Marsel'' Tahirov bilgelängäne iğlan itelde. Marsel'' Tahirovqa 39 yäş, ul 1988 yılda awıl xucalığı institutın tämamlağannan soñ tuğan yağında, Ätnä rayonında awıl xucalığında 2000 yılğa xätle eşlägän. Annarı soñ Qazanda agronomiä tarmağında eşli torğan fänni-ğamäli şirkät citäkçese bulıp eşlägän. Şunısında äytergä kiräk, Marsel'' Tahirov millät canlı keşe. Ul bıyıl Ätnä Sabantuyında 11 yıl rättän batır qaldı. Milli köräş buyınça 8 tapqır Tatarstan häm 2 tapqır Rusiä çempionı iseme yawlağan köräşçe.
