Accessibility links

Кайнар хәбәр

Ğiraqta üterelü turında yalğan video töşerep mäglümät çaraların sınaw – şayartumı, cinayätme?


Quşma Ştatlarnıñ San Fransisco şähärendä bank xezmätkäre bulıp eşlägän 22 yäşlek Benjamin Vanderford Ğiraqtağı ğisyançılar tarafınnan üterelüe turında yalğan video-tasmanı üze yasağanın tanıdı. İnternetqa urnaştırılğan bu tasmanı şimbä könne dönyanıñ berniçä telekompaniäse kürsätep ölgerde. Benjamin süzlärençä ul bu ğämäle belän mäglümät çaraların sınarğa telägän:

Audio (Benjamin Vanderford)

"Minemçä monnan ike näticä çığarıp bula. Berençedän, monıñ işe video-tasmalarnı yasaw bik ciñel. İkençedän, mäglümät çaraları mäsäläne centekläp tikşermiçä, bik tiz ışana. Näticädä cämğiätne aldaw bik ciñel eş bulıp çığa."

Benjamin süzlärençä, ul Ğiraq ğisyançıları töşergän tübän sifatlı tasmalarnı, şul isäptän Amerikan watandağı Nicholas Bergnıñ başı kiselü tasmasın kürgännän soñ, monı üze yasap qararğa bulğan. Başlap ul Äl-Qaidä tarafdarı sanalğan Äbü Musab Äl-Zarqawinıñ İnternet säxifäsen öyrängän. Annarı iptäşe belän ber garajğa barıp video töşergän. Älege tasmada Benjamin urındıqta utıra häm amerikan xärbilären Ğiraqtan kitergä çaqırğan belderü yasıy. Anarı anıñ muyınına pıçaq kiterelä, läkin kisü küreneşe kürsätelmi. Benjamin süzlärençä, alar bu küreneşne başqa yaqtan töşergän:

Audio (Benjamin Vanderford)

"Kisü küreneşe başqa yaqtan töşerelde, şuña kürä anda berni añlaşılmıy."

Benyamin äytüençä, soñnan alar Adobe Premier programması yärdämendä tasmanı üzgärtep çınğaraq oşatırğa tırışqan. Hamas säxifäsennän räsemnär, tawışlar östägännär. Soñnan şuşı tasma İnternetqa urnaştırılğan.

Benjaminıñ änise Theresa, ulınıñ ğämäle turında jurnalistlardan işetkän. Şimbä könne video-tasma dönya kürgändä Benjamin eş urınında bulğan.

Bu ğämäl cinäyät sanalamı-yuqmı, San Fransisco politsiäse häm FBİ räsmiläre älegä özderep äytmi. FBİ tikşerü eşlären başladı.

Ali Gilmi, Praga
XS
SM
MD
LG