Accessibility links

Кайнар хәбәр

Qazannıñ 999 yıllığı - 1000 yıllıqnıñ repetitsiäse


Qazan şähäre administratsiäse Qazannıñ 999-yıllığın ütkärü çaraları manzarasın iğlan itte. Soñğı yıllarda Qazannıñ meñ yıllıq tarixı buluı açılğaç, şähär köne 30 avgustta Respublika köne belän ber itelgäç, bu çaralarnıñ tärtibe, ğöref-ğadätläre urnaştı. Şulay da, bıyılğı Şähär köne çaraları üzençälekle - bu Qazannıñ meñ yıllığınıñ general' repetitsiäse. Şähärne tözekländerergä, üzgärtep qorırğa tağın ber yıl ğına qala. Älegä ul zur ber tözü mäydanın xäterlätä. Çärşämbe könne Qazannıñ dürtençe transport dambasın tözüne däwam itterü öçen şähärne urtalay yarıp uzuçı Yerşov uramınıñ ber öleşen yabıp quydılar. Künegelgänçä yörergä tırışqan avtomobil'lär taşqınıñ xäzerge waqıtta Çexov bazarı qarşında ike maxsus avtomobil' belän “qorallanğan” distägä yaqın Däwlät avtoinspeksiäse xezmätkäre köç xäl belän köyläp tora. Ä bit sişämbe könne ütkän Yul iminlege komissiäseneñ çirattan tış utırışında respublikada yul faciğäläreneñ artuınıñ ber säbäbe itep Däwlät avtoinspeksiäseneñ küzätep toru xezmäteneñ 50% ğına tuplanğan buluın atadılar. Bu Qazannıñ meñ yıllığı general' repetitsiäseneñ tiskäre üzençälege. Uñayların çärşämbe könne Qazan administratsiäse xezmätkärläre Tatar kongressı binasında Şähär könenä äzerlekkä bağışlanğan brifingta söylädelär. Administratsiäneñ Säwdä idäräse başlığı urınbasarı Polina Mavrina 30 avgustqa şähärdä dürt säwdä kompleksı açıla, dip belderde. Alar - Almaniäneñ “Cash & Carry” firmasınıñ “Metro” küpläp satu kompleksı, Bauman uramında GUM-2, Ciñü prospektında “Южный” häm Qaban buyında “Кarawаn” säwdä kompleksları. Bäyrämgä şähärneñ Üzäk stadionı da üzgärtep qorıla. Anda utıru urınnarı 25-26 meñgä arttırıla, stadion tiräsendäge kafe häm barlar, kibetlär yañadan salınaçaq.

Qazannıñ 999-yıllığında täwge märtäbä aerostatlarınıñ Euro-aziä festivale ütkärelä. Respublika könnärendä şähär östendä hawa şarları berän-särän kürengännäre bar inde. Läkin bu yulı ul çara Xalıqara festival' itep zurlap ütkärelä. Festival'dä 15ләп aerostat qatnaşa. Bäyrämneñ iñ qızğan çağında alar Qazan Kremle östenä kütärelep, “Tönge balqış” digän tamaşa kürsätäçäklär. Bu general' repetitsiä bula. Ä inde Qazannıñ 1000-yıllığına Aerostatlar festivalenä Fransiä, Bel'giä, Pol'şa, Belorussiä, Almaniä, Qıtay, Mongoliädän ekipajlar kiler, dip farazlana. Qazannıñ 1000-yıllığına bağışlap maxsus aerostat yasalır dip tä farazlana.

Yunıs Ätnäle

XS
SM
MD
LG