Accessibility links

Olimpiä uyınnarında doping cancalı: ike grek sportçısı olimpiadada qatnaşmayaçağın belderde


Olimpiä uyınnarı başlanmas borın qupqan canal bügen üzenä kürä çişeleş taptı. Olimpiada başlanuğa ber kön qala Gretsiäneñ ike tanılğan sportçısı, qısqa arağa yögerüçe Costas Kenteris belän Katerina Thanou doping tikşerüdän qaçıp, säyer yul qazasına yulığıp, xastaxanägä yaqtan ide. Şuşı qissa ber atna buyına mäglümät çaralarınıñ iğtibar üzägendä tordı. Nixayät, çärşämbedä sportçılarnıñ ikese dä uyınnarda qatnaşmayağın belderde.

2000 yıl Sydney olimpiadasında 200 metr yögerüdä altın medal yawlağan Costas Kenteris Gretsiädä milli qaharman sanala ide. Şul uq uyınnarda kömeş medal alğan Katerina Thanou belän ikese alar bıyılğı, Gretsiäneñ üzendä ütkän uyınnarda greklarnıñ iñ zur ömetläre ide. Comğa könne açılu tantanasında Kenteris xättä Gretsiä bayrağın kütärep barır dip kötelä ide. Ämmä açıluğa ber kön qala säyer waqiğalar buldı. Pänceşämbe kiçendä Costas belän Katerina doping tikşerüdän baş tartqan digän xäbärlär kilde. Bu isä Xalıqara Olimpiä Komitetı taläplären bozu sanala. Şuk uq könne bu ike sport yoldızı motosiklğa utırıp qayadır barğanda yul qazasına eläkkän, cäräxätlär alğan, 5 köngä xastaxanägä salınğan digän xäbär taratıldı. Tik bu qazanı, cimerek motoskiklnı, cäräxätlärne kürgän ber genä şahit ta tabılmadı. Xalıqara Olimpiä Komitetınıñ Tärtip komissiäse sportçılarnıñ xastaxänädän çığuın kötep, tıñlawlarnı ike tapqır kiçekterep tordı. Nixayät, çärşämbedä Kenteris belän Thanou komissiägä kilep bu uyınnarda qatnaşmayaçaqların iğlan itte. Jurnalistlar aldına çığıp Costas Kenteris bolay dide:

Audio (Costas Kenteris)

"Min cawaplılıq yözennän, bu Olilmpiä uyınnarında qatnaşudan baş tartam. Şunı da äytäsem kilä, min trenerım Xristos Tzekos belän xezmättäşlegemne tuqtatam."

Sportçılarnıñ ikese dä nindi dä bulsa doping qullanuların kire qağa. Kenteris süzlärençä, ul tikşerüneñ bulasın belmägän, şuña kürä kilmägän. Alarnıñ tikşerüne xastaxanädä ütkärü üteneçen Olimpiä komitetınıñ Meditsina komissiäse kire qaqtı. Komissiä başlığı Arne Ljungqvist Şevtsiäneñ "Expressen" gäzitenä äytüençä, küräseñ alar, tikşerüne xastaxanädä ütep näticälärneñ üz faydasına buluına ömetlängän. Çärşämbedä Xalıqara Olimpiä komitetı süzçese Giselle Davies mondıy näticä yasadı:

Audio (Giselle Davies)

"Costas Kenteris, Katerina Thanou häm alarnıñ trenerı Xristos Tzekos tanıqlıqların tapşırdı. Şulay itep alar bu Olimpiä uyınnarında qatnaşu xoquqın yuğalta."

Xalıqara Olimpiä komitetı alarğa qarata ber çara da kürergä cıyınmıy, ä bu eşne Xalıqara Ciñel atletika federatsiäsenä tapşıra. Şuşı cancal 1988nçe yılda Seul olimpiadasında Kanada sprinterı Ben Johnson toılğannan birle iñ zur cancal buldı. Ul xättä greklarnıñ üzläreneñ da açuın çığardı. Xökümät süzçese Todoris Russopolus, bu waqiğa ilebezneñ dönyadağı abruyın töşerde, dip belderde. Äytergä kiräk, bu uyınnarda grek sportçıları dopnig cancalına bäyle berdänber sportçı tügel. 100 metr yögerüdä dönya çempionı amerikan Torri Edwards 2 yılğa sporttan çitlätelgän ide. Çärşämbedä ul Olimpiä komitetına möräcägät itep bu uyınnarda qatnaşırğa röxsät soradı. Anıñ möräcäğäte kire qağıldı.

Soñğı yıllarda sportta doping qullanu baş bäläsenä äylände. Tikşerüçe oyışmalar tıyılğan darular isemlegen arttıra tora. Farmatsevtika şirkätläre isä yañaların uylap çığara tora. Zur sportta säxnä artında tağın ber bäyge bara diärgä bula. Bu olimpiadada tikşerülär qırıs bulaçaq, alar yarış könnärendä genä tügel, ä teläsä qaysı waqıtta ütkäreläçäk dip meditsina komissiäse aldan kisätep quyğan ide.

Häm axırda olimpiä uyınnarında qatnaşqan millättäşlärebez turında ber ike süz, xörmätle tıñlawçılar. Xäbär itkänebezçä, Rusiä komandasıında ğına alar ike distä çaması. Sişämbedä şularnıñ berse Peterbur qızı Nataliä Cihanşina gimnastikada Rusiä komandası belän bergä 3nçe urınğa çığıp bronz medal yawladı. Qalğan millätäşlärebezgä dä Gretsiädä uñışlar telibez.

Ali Gilmi, Praga
XS
SM
MD
LG