Accessibility links

Кайнар хәбәр

Semberdä mäğärif xezmätkärläreneñ awgust kiñäşmäläre bara: tatar tele uqıtuçılarına da ayırım oçraşu, kiñäşläşü mömkinlege birelde


Avgust 18 uzğan ölkäküläm kiñäşmädä 21 seksiä eşläde. Alar arasında ayırım-ayırım alman, ingliz, frank telläre uqıtuçıları seksiäläre dä eşläde. Ä menä cirle tatar, çuaş, muqşı xalıqlarınıñ telläre uqıtuçıları öçen ğomum seksiä genä qaralğan ide. Şunlıqtan plenar häm yomğaq utırışları urıs telendä bardı. Döres, bu öç tel uqıtuçılarına üzläreneñ “podseksiäse”ndä ana telendä aralaşu mömkinlege dä tudırıldı.

Äzerlängän dokladlar ğädäti räsäyçä buldı inde. Ämma “tügäräk östäl” söyläşüendä uqıtuçılar ana telenä qarata mönäsäbät turında tirän borçulı fikerlär dä äyttelär. Ana tele buyınça olimpiadalarnı oyıştıru buyınça anıq täqdimnär kertelde. Qazannıñ 1000 yıllığına bağışlanğan çaralar da iğtibarğa layıq. Mäsälän, märkäzebez Qazanğa bağışlanğan inşalar, şiğerlär bäygese iğlan itü, alarnıñ iñ yaxşıların “Ömet” gäzitenä tapşıru.

Tatar tele uqıtuçıları ana telen federal' komponent programmasına kertü täqdime belän dä çıqtılar. Läkin yomğaq utırışında bu täqdim kire qağıldı.

Uqıtuçılar äytüençä, bıyıl ällä ni üzgäreşlär yuq: nigezdä elekkeçä bara eşlär. Keçkenä yañalıq ta bar. Moña qädär Novospassk rayonı mäktäplärendä ana teleneñ ise dä kilmi ide. Cirle avtonomiä tırışlığı arqasında, rayon üzägendä, fakul'tativ räweşendä genä bulsa da, tatar tele uqıtıla başlıy. Bu izge eş cirle pedagogiä universitetınıñ tatar tele törkemendä uqıp çıqqan – bügen rayon gäcite “Sel'skaya pravda”da eşläwçe Gölnara Sämirxanowağa tapşırılğan.

Ölkä üzägeneñ Yaña şähär dip atalğan İdelaryağı rayonı märarif idäräse metodistı Zifa Sabitovpa äytüençä, rayonnıñ ike mäktäbendä tatar balalarınnan ğına torğan berençe sıynıflar tuplanğan. Qalan ayırım sıynılar da uñışlı ğına eşläp kilä.

Ä menä xäwefle xäbär. Dimitrowgard şähärendä tatar gimnaziäse açılaçağı turındağı şatlıqlı xäbärne Sember tatar cämäğätçelege genä tügel, Bötendönya tatar Kongressı citäkçelege ğorurlanıp qabul itkän ide. Qazan mäğlümlät çaraları da bu turıda şawlap aldılar. Uquçılar häm uqıtuçılar kollektivı tuplandı, mäktäp-gimnaziäneñ täpiläp kitüenä bar närsä dä äzer kebek ide. Ämma soñğı waqıtta taralğan imeş-mimeşlär bu niät aldında törle tozaqlar qorıluın kürsätä.

“Azatlıq” radiosı, Ayrat İbrahim, Sember.

XS
SM
MD
LG